Bishkekte qylmystyq top Qazaqstan azamatynyń 40 myń dollaryn tartyp aldy
ASTANA. QazAqparat - Qyrǵyz eliniń astanasy - Bishkek qalasynda qylmystyq top Qazaqstan azamatyna shabýyl jasap, 40 myń dollar qarjysyn tartyp alǵan, dep habarlaıdy QazAqparat.
Bishkek polıtsııa basqarmasy áleýmettik jelidegi paraqshasynda jedel qyzmetkerleriniń buzaqylardy qolǵa túsirgenin málimdegen.
«10 jeltoqsanda Bishkek qalasynyń Oktıabr AІІB-ne Qazaqstan Respýblıkasynyń azamaty D.Sh jazbasha aryzdandy. 7 jeltoqsan kúni shamamen saǵat 15.00-de oǵan qylmystyq top fızıkalyq kúsh qoldanyp, belgisiz markaly tapanshamen qorqytyp, 40 000 AQSh dollaryn qolma-qol alyp ketken.
Atalǵan derek basqarmanyń qylmystardyń biryńǵaı tizilimine tirkelip, Qyrǵyz Respýblıkasy Qylmystyq kodeksiniń 207-baby (qaraqshylyq) boıynsha qylmystyq is qozǵaldy», - dep jazdy vedomstvo.
Tergeý jáne izdestirý is-sharalary barysynda Bishkek qalalyq ІІB-niń jedel ýákilderi atalǵan qylmysty jasaýǵa 2-3 adamnan turatyn uıymdasqan qylmystyq toptyń qatysy bar ekendigi týraly aqparat alǵan. Qyrǵyz Respýblıkasy Іshki ister mınıstrliginiń jedel áreket etý jasaǵy kúdikti retinde 1993, 1991 jáne 1996 jyly týǵan azamattardy ustady. Olar tergeý qyzmetine jetkizilip, ýaqytsha ustaý ızolıatoryna qamaldy. Bishkektiń Oktıabr aýdandyq soty barlyq kúdiktilerdi eki aıǵa qamaýǵa alý túrindegi bultartpaý sharasyn tańdady.
Vıdeodan alynǵan kadr
