Bishkekte qulaǵan ushaqtyń janarmaıynan balalar ýlanyp qalǵan
BІShKEK. QazAqparat - Bishkek mańyndaǵy Dacha-Sýý aýylynda oryn alǵan áýe apaty saldarynan tógilgen avıatsııalyq janarmaı býynan balalar ýlanyp qaldy, dep habarlaıdy «QazAqparat» HAA-nyń Qyrǵyzstandaǵy menshikti tilshisi.
Qyrǵyzstan Respýblıkasynyń Densaýlyq saqtaý mınıstrliginiń málimetine súıensek, búgin Dacha-Sý aýylynda turatyn bes bala Bishkektegi №3 balalar aýrýhanasyna jatqyzyldy. Bastapqy málimetterge sensek, olar áýe kerosıninen ýlanǵan.
Eske sala keteıik, 16 qańtar kúni saǵat tańǵy 7.31-de Bishkektiń Dacha-Sýý aýylynda áýejaıǵa jaqyn jerde Gonkongten Túrkııaǵa bet alǵan Boeing-747 júk ushaǵy qulady. Apat saldarynan 38 adam mert boldy, zardap shekkenderdiń biri keshe aýrýhanada kóz jumdy.
