Bishkekte qulaǵan Boıngtiń qara jáshigindegi aqparattar alyndy
BІShKEK. QazAqparat - Bishkek mańynda qulaǵan «Boıng -747» ushaǵynyń qara jáshiginen qajetti málimetter alyndy, dep habarlaıdy «QazAqparat» HAA-nyń Bishkektegi menshikti tilshisi Qyrǵyzstannyń kólik jáne jol mınıstrliginiń baspasóz qyzmetine silteme jasap.
Vedomstvonyń deregine súıensek, jáshikterdegi aqparat Memleketaralyq avıatsııa komıteti tergeý jumystaryn aıaqtaǵannan keıin jarııalanady.
«Qazirgi tańda ushaqtyń synyqtary áýejaıdyń ushaq turaǵyna ornalastyrylýda. Qoldaǵy bar bólshekterden Boıngtyń maketi jasalynady. Qaldyqtardyń jartysy qosymsha saraptama jasaý úshin jáne apattyń sebebin anyqtaý úshin AQSh-qa jiberiledi», - dep túsindirdi mınıstrlikte.
Eske sala keteıik, 16 qańtar kúni saǵat tańǵy 7.31-de Bishkektiń Dacha-Sýý aýylynda áýejaıǵa jaqyn jerde Gonkongten Túrkııaǵa bet alǵan Boeing-747 júk ushaǵy qulady. Apat saldarynan 38 adam mert boldy, zardap shekkenderdiń biri keshe aýrýhanada kóz jumdy.
