Bishkekte koronavırýs juqtyrǵandar sany ósip, «qyzyl» aımaqqa endi

BІІShKEK. Kabar-QazAqparat – Bishkek koronavırýstyń taralýy boıynsha «qyzyl» aımaqqa kirdi. Bul týraly Qyrǵyz Respýblıkasynyń Densaýlyq saqtaý jáne áleýmettik damý mınıstriniń orynbasary Ulyqbek Bekturǵanov aıtty, dep habarlaıdy QazAqparat Kabar agenttigine silteme jasap.

«Elordada táýligine 77 jańa COVID-19 oqıǵasy tirkeldi, onyń ishinde 52 jaǵdaı zerthanalyq rastaldy, 25-niń klınıkalyq-epıdemıologııalyq belgileri bar. Shý oblysy sary aımaqqa kirdi, al respýblıkanyń qalǵan 6 oblysy burynǵysynsha jasyl aımaqta», – dedi ol.

Sondaı-aq shekteý sharalary men karantındi engizý týraly sheshimdi óńirdegi epıdemıologııalyq jaǵdaıdy eskere otyryp, jergilikti jerlerdegi tótenshe epıdemııaǵa qarsy komıssııa (TEK) sheshetinin aıtty.

Anyqtama retinde: óńirlerdi túster boıynsha aımaqqa bólý eki kórsetkishpen baılanysty – bul R- reprodýktsııasy nemese ınfektsııa juqtyrǵan adamnan baılanysatyn adamǵa berilý kórsetkishi. Ekinshi kórsetkish – sońǵy jeti kúnde 100 myń turǵynǵa shaqqandaǵy aýrý-syrqaý sany.