Bishkekte Qazaqstan men Qyrǵyzstan úkimetteri basshylarynyń ekijaqty kezdesýi ótýde
BІShKEK. QazAqparat - Bishkekte «Ala-Archa» memlekettik rezıdentsııasynda Qazaqstan Respýblıkasynyń Premer-Mınıstri Baqytjan Saǵyntaev pen Qyrǵyz Respýblıkasy Premer-Mınıstriniń mindetin atqarýshy Sooronbaı Jeenbekovtiń ekijaqty kezdesýi bastaldy, dep habarlady Bishkektegi «QazAqparat» HAA menshikti tilshisi.
Taraptar yntymaqtastyq perspektıvalaryn talqylaıdy, atap aıtqanda, saýda-ekonomıkalyq áriptestik, mádenı-gýmanıtarlyq baılanystardy nyǵaıtý máseleleri, kólik, ónerkásip, energetıka salasyndaǵy birlesken jobalar talqylanady. Ekijaqty kelissózder qorytyndysy boıynsha birqatar qujattarǵa qol qoıý josparlanýda. Atap aıtqanda, tehnıkalyq qaýipsizdik, temir jol tasymaldaryna tarıfterdi birdeılendirý, Qazaqstan tarapynan «EAEO-ǵa Qyrǵyzstannyń qosylýy boıynsha jol kartasy» aıasynda 100 mln dollar kóleminde qarjylaı kómek bólý boıynsha úkimetaralyq kelisimder.
Eske salsaq, Baqytjan Saǵyntaev Qyrǵyzstanǵa 3 qarashada Qyrǵyz Respýblıkasynyń tóraǵalyǵymen Bishkekte ótetin Shanhaı yntymaqtastyq uıymyna múshe memleketter úkimetteriniń basshylar keńesiniń 15-shi mereıtoılyq otyrysyna qatysý úshin bardy.
Búginde Qazaqstan ShYU tóraǵasy bolyp tabylady, al 2017 jyldyń 8-9 maýsymynda Astanada uıymǵa múshe memleketter basshylarynyń Sammıti ótedi. Qazaqstan Respýblıkasynyń tóraǵalyq etýshi memleket retindegi saıası is-qımyldary ekonomıkalyq jáne mádenı yntymaqtastyq pen qaýipsizdik máselelerinen turatyn, Uıym aıasyndaǵy kópjaqty ózara is-qımyldyń negizgi baǵyttaryn teńdestirilgen túrde damytýǵa baǵyttalǵan.
