Bishkekte Elbasynyń «Táýelsizdik dáýiri» atty kitabynyń tusaýkeseri ótti
Іs-sharaǵa Qyrǵyz Respýblıkasynda akkredıttelgen dıplomatııalyq korpýstyń, mınıstrlikter men vedomstvolardyń, Qyrǵyzstan halqy assambleıasynyń, qazaq dıasporasynyń, buqaralyq aqparat quraldarynyń, Qyrǵyzstan qoǵamdyq-saıası jáne isker toptarynyń 150-den astam ókilderi, sondaı-aq qazaq ınvestorlary qatysty.
Tusaýkeserde Qazaqstan Respýblıkasynyń Tótenshe jáne Ókiletti Elshisi Karım Kókirekbaev, Qazaqstan Respýblıkasy Prezıdentiniń burynǵy keńesshisi, QR eńbek sińirgen qaıratkeri, professor, ekonomıka ǵylymdarynyń doktory S.Pirimbetov, Qyrǵyz-Qazaq ýnıversıtetiniń rektory, professor, pedagogıka ǵylymdarynyń doktory A.Qazmaǵambetov, «Qyrǵyz týýsý» gazetiniń jaýapty hatshysy, «Álem jazýshylary odaǵynyń múshesi» N.Baıjigitov baıandama jasady.
Qazaqstan Elshisi K.Kókirekbaev óz sózinde Memleket basshysy N.Nazarbaevtyń «Táýelsizdik dáýiri» atty kitabynda damýdyń «qazaqstandyq modeliniń» negizgi qaǵıdattary, tetikteri men qozǵaýshy kúshi baıandalǵanyn, elde totalıtarlyq júıe qulap, naryqtyq ekonomıka qalyptasqan jańǵyrtýdyń úsh tolqyny sıpattalǵanyn atap kórsetti.
«Kitaptyń basty ereksheligi - oqıǵalar osy tarıhı qubylystar men úderisterdiń belsendi qatysýshysy - bizdiń Elbasymyzdyń atynan baıandalady», - dedi ol.
Elshi kitap Prezıdenttiń jańa tehnologııalardy engizýge ekpin berilgen keıingi Joldaýymen, sondaı-aq QR Parlamenti palatalarynyń birlesken otyrysynda Memleket basshysy usynǵan «Prezıdenttik bes áleýmettik bastamamen» ushtasyp jatyr degen pikir bildirdi.
Basqa sóz sóıleýshiler de jańa Qazaqstannyń negizgi qalyptasý kezeńderine, damýdyń qazaqstandyq modeline nazar aýdardy. Atap aıtqanda, S.Pirimbetov elimiz qol jetkizgen jetistikter jeńildikpen kelmegenin, munyń bári ǵylymı negizdemelerdi, elimizdiń aýqymdy jańǵyrýynyń qatysýshylary - barlyq qazaqstandyqtardyń kúsh jumyldyrýyn, saıası qurylysty qaıta qalyptastyrýdy, etnosaralyq qatynastardy jetildirýdi, tirshiliktiń barlyq salalarynda sapaly reformalardyń iske asyrýyn talap etkenin basa aıtty. Munyń bári Prezıdenttiń kitabynda oqyrmanmen erkin suhbat túrinde órbıtinin aıtty.
Ár adamǵa qarapaıym da túsinikti tilmen jazylǵan «Táýelsizdik dáýiri» kitabynyń biregeı tarıhı qujat retindegi qundylyǵyna Qyrǵyz-Qazaq ýnıversıtetiniń rektory A.Qazmaǵambetov aıryqsha ekpin berdi.
«Qazirgi zamanǵy kadrlardy daıarlaýǵa jaýapty joǵary oqý ornynyń ujymy Qazaqstan damýynyń qorytyndysy jasalǵan kitaptyń jaryqqa shyǵýyn úlken qyzyǵýshylyqpen qabyldady. Bilim alýshy jastar úshin atalǵan eńbektiń qundylyǵy erekshe, sebebi onda áli eshbir oqýlyqtarǵa enbegen eldiń damý tarıhy týraly mańyzdy aqparattar jeterlik», - dedi ol.
Sonymen qatar, «Kyrgyz týýsý» gazetiniń jaýapty hatshysy kitapta, ásirese 140 ult jáne 17 konfesssııa ókilderi eldiń kóshbasshysy tóńiregine qalaı toptasyp, kelispeýshilikter men qaıshylyqtardy qalaı boldyrmaǵanyn, sóıtip barsha ulttar men ulystardyń qaryshtap damyp jatqany qamtylǵanyn málimdedi.
Sóz sońynda K.Kókirekbaev is-sharaǵa qatysýshylarǵa Qazaqstannyń Ortalyq Azııa elderimen ózara qarym-qatynasyna jáne Qyrǵyzstanmen ekijaqty qatynastarǵa arnalǵan bólimine, olardyń ekijaqty qarym-qatynastardy damytý aıasyndaǵy ózektiligine nazar aýdarý qajet ekenin aıta otyryp, «Táýelsizdik dáýiri» kitaby bizdiń elimizdegi jáne shet elderdegi oqyrmandardyń aýqymdy toby úshin qyzyqty ekenin atap ótti.
Qonaqtar «Táýelsizdik dáýiri» kitabynyń qazirgi zamanǵy saıasattaný salasyndaǵy róli men ornyna joǵary baǵa berdi.
