Bishkekte búgin keshki 20:00 bastap tótenshe jaǵdaı rejımi engiziledi
BІShKEK. QazAqparat - Qyrǵyzstan prezıdenti Sooronbaı Jeenbekov búgin, 9 qazanda Bishkek qalasynyń aýmaǵynda tótenshe jaǵdaı rejımin engizý týraly jarlyqqa qol qoıdy, dep habarlaıdy QazAqparat Kabar agenttigine silteme jasap.
Jappaı tártipsizdikter nátıjesinde týyndaǵan zorlyq-zombylyqpen jáne adamdardyń ómiri men densaýlyǵyna qater tóndirýmen ushtasatyn qalyptasqan jaǵdaıǵa baılanysty, sondaı-aq Qyrǵyz Respýblıkasy Konstıtýtsııasynyń 15-babyna, 64-baby 9-bóliginiń 2-tarmaǵyna jáne «Tótenshe jaǵdaı týraly» Qyrǵyz Respýblıkasy Konstıtýtsııalyq Zańynyń 3, 4, 7, 8-baptaryna sáıkes azamattardyń ómiri men densaýlyǵyn, olardyń qaýipsizdigin qorǵaýdy qamtamasyz etý múddesinde, budan bólek, Bishkek qalasynyń aýmaǵynda qoǵamdyq tártipti qamtamasyz etý maqsatynda:
Qyrǵyz Respýblıkasy Bishkek qalasynyń aýmaǵynda 2020 jylǵy 9 qazan saǵat 20.00-den 2020 jylǵy 21 qazan saǵat 08.00-ge deıin tótenshe jaǵdaı engiziledi.
Qyrǵyz Respýblıkasy Іshki ister mınıstriniń orynbasary Almazbek Qydyrbaıuly Orozalıev Bishkek qalasynyń tótenshe jaǵdaı kezeńindegi komendanty bolyp taǵaıyndaldy.
Qyrǵyz Respýblıkasy Bishkek qalasynyń aýmaǵynda tótenshe jaǵdaı rejımin qamtamasyz etý úshin komendatýra qurylyp, Bishkek qalasynyń komendatýrasy týraly ereje qosymshaǵa sáıkes bekitildi.
