Bishkekte belgisiz bireýler qalalyq sý arnasyn basyp alýdy kózdep otyr
BІShKEK. KABAR-QazAqparat – «Bishkeksýýkanaly» óndiristik-paıdalaný basqarmasynyń (ÓPB) strategııalyq mańyzdy nysanyn reıderlik jolmen basyp alýǵa daıyndyq júrýde, dep habarlaıdy QazAqparat Kabar agenttigine silteme jasap.
«Qurmetti qyrǵyzstandyqtar! «Bishkeksýýkanaly» ÓPB ujymy jurtshylyqqa, Úılestirý keńesine, Premer-Mınıstrdiń mindetin ýaqytsha atqarýshy S.Japarovqa júginedi. Strategııalyq mańyzdy nysan - «Bishkeksýýkanaly» ÓPB-ny reıderlik jolmen basyp alýǵa daıyndyq júrýde. Basqarmanyń negizgi mindeti – sýmen jabdyqtaý jáne sý tartý.
Sý arnasynyń qyzmetkerleri saıasattan tysqary. 24/7 demalyssyz jáne mereke kúnderinsiz jumys isteıdi. Basqarma ujymy úılesimdi mehanızm retinde úzilissiz jumys isteıdi. Alaıda, keıbir destrýktıvti kúshter sońǵy oqıǵalar aıasynda jaǵdaıdy paıdalanyp, «Bishkeksýýkanaly» ÓPB-ny óz qoldaryna alýǵa bekingen. «Bishkeksýýkanaly» ÓPB ujymy saıasattan tysqary jáne óziniń tikeleı mindetimen ǵana aınalysatynyn taǵy bir márte málimdeımiz. Ol Bishkek pen onyń aınalasyn aýyz sýmen, sondaı-aq aǵyndy sýlardy kanalızatsııamen qamtamasyz etedi. Jurtshylyqty «Bishkeksýýkanaly» ÓPB ujymyn qoldaýǵa jáne Qyrǵyzstan astanasy úshin strategııalyq mańyzdy nysandy reıderlik basyp alýǵa jol bermeýge shaqyramyz», - delingen habarlamada.
Aıta keteıik, jeksenbi, 4 qazan kúni Qyrǵyzstanda Jogorký Keneshke depýtattarynyń saılaýy ótti. Depýtattyq mandatqa 16 partııa úmitkerlik etti. Daýys berýdiń aldyn ala málimeti boıynshy, 7% mejeni 4 partııa eńserdi. Al, 5 qazan kúni saılaý nátıjesine kóńili tolmaǵan bir top adam ortalyq alańda mıtıng uıymdastyryp, onyń sońy jappaı tártipsizdikterge ulasty.
