Bishkekte «Barselonanyń» ańyz oıynshylary jasyl alańǵa shyqty

ASTANA. QazAqparat – Bishkek qalasynda «Barselona» men Azııanyń ańyz oıynshylary arasynda fýtboldan joldastyq kezdesý boldy, dep habarlaıdy QazAqparat tilshisi.

Azııalyqtar sapynda Qyrǵyzstan Prezıdenti Sadyr Japarov, qazaqstandyq ardagerler Davıd Lorııa, Samat Smaqov, Andreı Karpovıch, Igor Avdeev, qyrǵyzstandyq Rýslan Sydyqov, ózbekstandyqtar Server Djeparov, Bahtıer Ashýrmatov, Leonıd Koshelev, ırandyq Hodadad Azızı jáne BAÁ ókili Bashır Saıd jasyl alańǵa shyqty.

«Barselonanyń» bastapqy quramy mynadaı boldy: Angoı Hesýs, Djýlıano Bellettı, Edgar Davıds, Karles Pýıol, Roberto Trasorras, Haver Savıola, Lıýdovık Jıýlı, Djovanı Dos Santos, Rıvaldo, Serhı Barhýan jáne Hýan Pablo Sorın.

Match aldynda sóz sóılegen S.Japarov qyrǵyzstandyqtardy Táýelsizdik kúnimen quttyqtap, Djalal-Abadta ashylǵan «Barselona» akademııasynyń jańa juldyzdardy tárbıelep shyǵarýǵa múmkindigi bar ekenin jetkizdi. Prezıdent sondaı-aq Bishkekte de osy klýb akademııasynyń irgesi qalanǵanyn habarlady.

Oıyn Dolon Ómirzaqov atyndaǵy stadıonda ótip, ony myńdaǵan jankúıer tamashalady. Kezdesý barysynda katalonııalyqtar Djovanı Dos Santos, Hýan Pablo Sorın jáne Haver Savıola jaýapsyz úsh gol soqty.

Matchqa jergilikti tóreshiler Ravshan Irmatov, Bahadyr Kochkarov, Abdýhamıdýllo Rasýlov, Sanjar Jaqypbekov jáne Ryspek Shekerbekov qazylyq etti.

Budan buryn Djalal-Abadta 29 tamyz kúni TMD elderinde alǵash ret «Barselona» klýbynyń 29-ynshy akademııasy saltanatty túrde ashyldy. Onyń ashylý rásimine Qyrǵyzstan Prezıdenti Sadyr Japarov, «Barselona» klýbynyń prezıdenti Joan Laporta bastaǵan mártebeli meımandar qatysty.

Eske sala keteıik, budan buryn qazaqstandyq fýtbolshylar Azııa juldyzdary quramynda «Barselona ańyzdaryna» qarsy oınaıtynyn jazǵan edik.