Bishkekte Bangladesh azamattaryn quldyqta ustaǵany ras pa - Qyrǵyz ІІM túsindirdi
BІShKEK. Kabar-QazAqparat – Qyrǵyzstannyń ishki ister mınıstrligi Bangladesh Respýblıkasynyń azamattaryn Bishkektegi tigin sheberhanasynda májbúrlep jumys istetýge qatysty túsinik berdi, dep habarlaıdy QazAqparat Kabar aqparat agenttigine silteme jasap.
Osylaısha, naýryz aıynda polıtsııaǵa kelgen Bishkek turǵyny qaladaǵy jańa ǵımaratta ornalasqan tigin tsehterdiń birinde Bangladesh azamattaryn qorqytý arqyly kúshtep quldyqta ustalyp jatqanyn aıtqan.
Atalǵan fakti Іshki ister mınıstrliginde tirkelip, sotqa deıingi tergeý amaldary bastaldy.
Tekserý barysynda aýdarmashynyń qatysýymen Bangladesh Respýblıkasynyń 14 azamaty suraldy.
«Shetel azamattarynyń Archa-Beshık turǵyn alabynda ornalasqan úıdiń aýlasynda jumys istep, sonda turyp jatqany belgili boldy. Joǵaryda atalǵan tigin tsehy «Alı ı Agzam» jaýapkershiligi shekteýli seriktestigimen kelisim boıynsha jumys istegen jáne Qyrǵyz Respýblıkasynyń aýmaǵynda jumys isteýge ruqsaty bolǵan», - dedi ІІM.
Sondaı-aq, Bangladesh azamattarynyń kelisimshart negizinde jumys istep, jalaqy alyp júrgeni anyqtaldy.
«Bul rette olardy qorlaý, qorqytý, uryp-soǵý jaǵdaılary bolǵan joq. Bul azamattar ózderi jumys isteıtin jer – tigin tsehynda turǵan», - dep túsindirdi polıtseıler.
Іstiń mán-jaıyn anyqtaý maqsatynda Bangladesh Respýblıkasynyń azamattary tergeý qyzmetine jetkizilip, olarǵa dene jaraqatyn keltirý faktisin anyqtaý úshin arnaıy sot-medıtsınalyq saraptama taǵaıyndaldy, is boıynsha qatysqan kýágerler aýdarmashynyń qatysýymen jaýap berdi.
Búginde saraptama qorytyndysy daıyn emes. Bishkek qalasy Lenın aýdandyq ishki ister basqarmasynyń tergeý qyzmeti tergeý amaldaryn júrgizip jatyr.
