Bishkekte aýa sapasyn anyqtaıtyn aparat ornatylady
ASTANA. QazAqparat - Bishkek qalasynyń aýdandaryna aýa sapasyn anyqtaıtyn aparat ornatylady. Bul týraly Ekologııa jáne jol qaýipsizdigi boıynsha konferentsııada «Move Green» ókili Salavat Baqtybekqyzy habarlady.
«Bizdiń joba aıasynda Bishkek qalasynyń ár jerine ornatylatyn aparat satyp alamyz jáne saıt ashamyz. Saıtta onlaın rejimde ár azamat Bishkek qalasyndaǵy aýdandar boıynsha zııandy zattardyń shoǵyryn kóre alady», - dep habarlady ol.
Onyń aıtýynsha, aýa sapasyn Bishkekte 1998 jyly gıdrometortalyǵy teksergen. Odan keıin qarjynyń joqtyǵynan jumys júrgizilmedi.
«Aýada densaýlyqqa qaýipti formaldegıdter, azot dıoksıdi jáne azot oksıdi bar, sońǵy ýaqytta olardyń aýadaǵy mólsheri kúrt artyp ketti», - dedi belsendi azamat.
Budan basqa, Soros qorynyń qoldaýymen «Move Green» belsendileri saýalnama júrgizip, android-qa mobıldik qosymsha ornatty. Ol arqyly Bishkek turǵyndary qalanyń ár óńirindegi aýa jaǵdaıy týraly derekter ala alady.
«Kóptegen suraqqa jaýap berýshiler basqa elderdiń, atap aıtqanda Ońtústik Koreıa men Eýropa elderiniń tájirıbesine súıenedi. Bul elderde aýa jaǵdaıyna tekserý júrgiziledi. Bizde «Bishkek ekologııasy» degen mobıldik qosymsha bar. Sol jerden zııandy zattar shoǵyryn kórýge bolady. Biraq bul naqty derek emes, sebebi arnaıy jabdyqpen ólshengen joq», - dedi ol.
Salavat Baqtybek qyzy jabdyqty ornatýǵa aýa sapasyna baılanysty týyndaǵan aýrýlardyń kóbeıýi sebep bolǵanyn aıtty.
