Bishkekte Arys qalasyndaǵy jarylystan zardap shekkenderge kómek jınalyp jatyr
Onyń sózinshe, aldyn ala qaıyrymdylyq kómek jınaý jumystary 28 maýsymǵa deıin jalǵasady degen jospar bar. Budan soń qolma-qol qarjy Qazaqstanǵa jiberiledi.
«Jeke óziniń atynan bólingen qarjyny prezıdent apparatynyń qyzmetkerleri bóldi. Biz kómekti qolma-qol qarjylaı da, gıgıenalyq zattar túrinde de jınap jatyrmyz. Qolma-qol qarjyny biz Qazaqstan Parlamentiniń depýtatyna joldaımyz - qazirgi tańda ol oqıǵa bolǵan aımaqta júr. Eger biz zattaı mol kólemde kómek jınaıtyn bolsaq, demalys kúnderi olardy Shymkentke jóneltemiz. Jınalǵan dúnıelerdiń barlyǵy týraly biz esep beremiz»,-dedi Japar Úsenov.
Kómek qabyldaý jumystary Bishkek qalasynyń Sport saraıy aýdanynda júrip jatyr. Baılanys telefondary: +996555990555 (Shyńǵys Úsenov). Qarjyny sondaı-aq «Elsom»: +996559022777 mekenjaıy boıynsha da joldaýǵa bolady.
Aıta keteıik, Túrkistan oblysynyń Arys qalasynda bolǵan oqıǵalardan soń Qyrǵyzstan Prezıdenti Sooronbaı Jeenbekov Prezıdenti Qazaqstan Prezıdenti Qasym-Jomart Toqaevqa telefon shaldy.
Qyrǵyz Respýblıkasynyń Prezıdenti Arys qalasyndaǵy jarylystardan qaza bolǵandardyń otbasylaryna kóńil aıtyp, jaraqat alǵandarǵa qoldaý bildirdi. Kórshi memlekettiń basshysy kisi ólimi men aýqymdy zardaptar ákelgen tótenshe jaǵdaıǵa Qyrǵyzstan shynaıy janashyrlyqpen qaraıtynyn atap ótti. Qasym-Jomart Toqaev Sooronbaı Jeenbekovke jáne baýyrlas qyrǵyz halqyna rızashylyǵyn bildirip, alǵys aıtty.
Aıta keteıik, osyǵan deıin Túrkistan oblysynyń Arys qalasyndaǵy áskerı bólimniń qoımasynda jarylys bolǵandyǵyn habarlaǵanbyz.
Oqıǵa ornyna shuǵyl túrde Memleket basshysy Qasym-Jomart Toqaev jetip, jarylys aýmaǵynan evakýatsııalanǵan turǵyndarmen kezdesti.
Sondaı-aq Arystaǵy jarylystan zardap shekkenderge kómek qolyn sozý maqsatynda elimizde «Arys, biz birgemiz» aktsııasy bastaldy.
