Bishkekte «Álemdik Nazarbaev» fılminiń alǵashqy kórsetilimi ótti

Fılmdi túsirýge túrtki bolǵan ıdeıa, kınolenta akterlerin tańdaý jáne túsirilim barysyndaǵy shyǵarmashylyq protsess týraly "QazAqparat" agenttiginiń Bishkektegi menshikti tilshisine atalmysh týyndynyń rejısseri Ómirzaq Tolobekov aıtyp bergen bolatyn.
 

"Nursultan Nazarbaev sekildi álemdik deńgeıdegi saıasatker týraly fılm túsirý meniń kókeıimde burynnan kele jatqan edi. Bastapqyda men Nazarbaevtyń jas kezinde Qyrǵyzstanda kóp jyldar boıy turyp kelgenin, bizdiń tildi, xalqymyzdy, mádenıetimizdi keremet biletinin estimegen edim. Jumys barysynda men Qyrǵyzstan Jazýshylar odaǵyna, qandaıda bir materıaldar tabylyp qalatyn shyǵar dep xabarlasqan edim. Jolym bolyp, onda Qazaqstan kóshbasshysy týraly kitap jazǵan Gúlsaıra Momynovamen kezigip qaldyq. Ol Nazarbaevtyń Qyrǵyzstandaǵy ómiri týraly kóp derekterdi jaıyp saldy. Keıin ol meni bolashaq prezıdentpen birge ósken, Nazarbaevtyń dostarymen tanystyrdy", - dedi Ó. Tolobekov.
 

Rejısserdiń aıtýynsha, fılm Almatyda, Astanada jáne Prezıdenttiń týǵan ólkesi Shamalǵanda túsirilgen. Kınoda Qazaqstan Prezıdentiniń jastyq shaǵy ǵana emes, onyń saıası qyzmeti, memlekettiń, jalpy bizdiń aımaqtyń damýyna qosqan úlesi jaıly baıandalady.

"Kartınanyń bir jyldyq túsirilimi kezinde onyń tanystaryn, dostaryn kóp keziktirdik. Olar óte qyzyq suxbat berdi. Biz Qazaqstan Prezıdentin myqty jáne tájirıbeli saıasatker retinde bilemiz, sondyqtan kartınada onyń qyzmetinde bolǵan jemisti kezeńder kórsetilgen", - deıdi avtor.
 

Fılmniń qarjylyq shyǵyndaryn óteýge belgili qyrǵyz kásipkeri, qazaq dıasporasynyń ókili Sabyrjan Seıdaxmetov qolushyn sozǵan.

Premerada bolǵan Qyrǵyzstannyń tanymal memlekettik qaıratkerleri, zııaly qaýym ókilderi jáne qarapaıym kórermender qazaqstandyq kóshbasshyny jańa qyrynan tanytyp, eki baýyrlas xalyqtardyń tyǵyz baılanysyn ashyp kórsetken fılm avtorlaryna úlken alǵystaryn aıtty.