Bishkekte Abaı atyndaǵy mádenı ortalyq ashylyp, uly aqynnyń bıýsti ornatyldy
Syrtqy ister mınıstrliginiń málimetine sensek, saltanatty jıynǵa Qazaqstan Elshisi Qaırat Nurpeıisov, Qyrǵyzstannyń Mádenıet, aqparat jáne týrızm mınıstri Nýrjıgıt Kadyrbekov, Syrtqy ister mınıstriniń birinshi orynbasary Nýran Nııazalıev, Qyrǵyzstan halqy assambleıasy keńesiniń tóraǵasy Abdygany Erkebaev, halyq aqyny, Qyrǵyzstannyń Qazaqstandaǵy burynǵy Elshisi Akbar Ryskýlov, sondaı-aq basqa da qoǵam jáne memleket qaıratkerleri qatysqan.
Jańa ortalyq Qyrǵyzstandaǵy qazaqtar qaýymdastyǵy men Qyrǵyz Respýblıkasynyń A. Osmonov atyndaǵy Ulttyq kitaphanasynyń bastamasymen jáne Qazaqstan Elshiliginiń tikeleı qoldaýymen ashyldy.
Alańy 420 sharshy metr quraıtyn ortalyq atalǵan kitaphana ǵımaratynda ornalasqan. Ortalyq úı-jaıynda jóndeý-árleý jumystary júrgizilgen, jıhazdar men kitaptarǵa arnalǵan sóreler ornatylǵan, qabyrǵalary ulttyq naqyshta bezendirilgen, májilis zaly, kelissózder júrgizý bólmesi jáne oqý zaly bar.
Abaı bıýsti men aqparattyq stend Ortalyqtyń negizgi ortańǵy bóliginde ornalasqan. Músinniń avtory jas ta talantty qyrǵyz sheberi Kýbanych Toktoraly ýýlý.
Ortalyq qyzmetiniń negizgi maqsaty Qazaqstan men Qyrǵyzstannyń mádenıetin, ónerin, dástúri men tarıhyn nasıhattaý bolyp tabylady.
Ashylý saltanatynda Q. Nurpeıisov Qazaqstannyń Mádenıet jáne sport mınıstri Aqtoty Raıymqulovanyń quttyqtaý hatyn oqyp berdi. Ol óz sózinde Abaı ortalyǵynyń ashylýy elimizdiń Táýelsizdik kúni qarsańynda bolyp otyrǵany kezdeısoq emes ekenin atap ótti. Óıtkeni, Qazaqstan men Qyrǵyzstan arasyndaǵy qarym-qatynastar 29 jyl ishinde ekijaqty yntymaqtastyqtyń barlyq salasy boıynsha ekpindi damýda, - dedi ol. Elshi ortalyqtyń qazaq jáne qyrǵyz sarapshylary, bıznes qoǵamdastyqtary, jáne mádenıet qaıratkerleriniń qatysýymen konferentsııalar, forýmdar, konsýltatsııalar, semınarlar, sımpozıýmdar, dóńgelek ústelder men ózge de birlesken is-sharalardy ótkzýge arnalǵan platforma retinde qyzmet etetinine senim bildirdi.
Jobany iske asyrý negizinen «KAZ Minerals Bozymchak» JShQ Bas dırektory Ilıas Týlekeevtiń, Qazaqstannyń Qyrǵyzstandaǵy Qurmetti konsýldary Bolot Abıldaev pen Sabyrbek Djýmabekovtiń, sondaı-aq Qyrǵyzstandaǵy qazaqstandyq basqa da kásiporyndardyń rııasyz kómeginiń arqasynda júzege asyryldy, olardyń arasynda: «Borusan Makina Kyrgyzstan LLC», «Nýr Telekom» JShQ,«Narodnyı» Saýda Úıi» JShQ,«Halyq Bank Qyrǵyzstan» AAQ,«JBI zaýyty» AAQ,«Nýraı Plastık» JShQ.
Ortalyqta Abaı Qunanbaıulynyń portreti (avtory – tanymal qyrǵyz sýretshisi Saparbaı Osmonalıev) jáne Uly dala oıshylynyń esimimen baılanysty kartınalar qoıylǵan. Budan basqa, Manas, Shoqan Ýálıhanov, Muhtar Áýezov, Shyńǵys Aıtmatov, jáne t.b. tulǵalardyń sýretteri de bar.
Qazaqstan tarapy atynan Ulttyq kitaphana men Ulttyq akademııalyq kitaphana, sondaı-aq Elshilik Qyrǵyzstannyń Ulttyq kitaphanasynyń qoryn tolyqtyrý úshin 500-den astam kitap tabys etti. Bulardyń ishinde Qazaqstan tarıhy, fılosofııa, ádebıettaný, óner salasyndaǵy basylymdar, sondaı-aq qazaqtyń klassıkalyq jáne qazirgi zamanǵy ádebıeti bar.
