Bishkekte 2 Qazaqstan azamaty ustaldy
BІShKEK. QazAqparat - Qyrǵyzstannyń astanasynda urlyqqa qatysy bar degen kúdikpen bir top «gastroler-urylar» ustaldy, dep habarlaıdy QazAqparattyń menshikti tilshisi Bishkektiń ishki ister bas basqarmasynyń baspasóz qyzmetine silteme jasap.
Bishkektiń Oktıabr aýdanynyń Іshki ister basqarmasyna qalanyń shaǵyn aýdandarynyń birinde turatyn adam habarlasqan. Azamat 2018 jylǵy 3 sáýirde belgisiz adamdar páterine kirip, baǵaly zattaryn urlap áketti dep aryz jazǵan.
Bıylǵy jyldyń mamyr aıynda ІІB-na Bishkektiń taǵy bir turǵyny shaǵym túsirgen. Onyń aıtýynsha, báz bireýler áıeldiń úıine kirip, 50 myń som aqshany urlap, alyp ketken.
Atalǵan faktiler boıynsha Qyrǵyz Respýblıkasy QK 164-babyna («Urlyq») sáıkes qylmystyq is qozǵaldy. Jedel izdestirý sharalary kezinde Qazaqstannyń eki azamaty -1983 jyly týǵan G. V jáne 1979 jylǵy Sh. R. ustaldy. Azamattardyń osyǵan uqsas qylmystarǵa qatystylyǵy tekserilip jatyr. Jedel tergeý sharalary júrgizilýde.
Jaldamaly páterdi tintý kezinde kúdiktilerden 5 uıaly telefon, saǵat, elektroshoker, qolǵap, ár túrli kiltter, zergerlik buıymdarǵa arnalǵan ólsheýishter, dollarlar men somdar tárkilengen. Ustalǵan azamattar Bishkek qalasynyń Іshki ister bas basqarmasynyń ýaqytsha tergeý ızolıatoryna qamaldy.
Buǵan deıin de páter tonaıtyn qazaqstandyq «gastroler-urylar» 2018 jyly aqpan aıynda Qyrǵyzstannyń astanasynda ustalǵan bolatyn.
