«Bishkek sammıti jańa músheler qabyldaýǵa ázir me?» - BAQ-qa sholý
***
Memleket basshysy Nursultan Nazarbaev Memlekettik qyzmet isteri jónindegi agenttiktiń tóraǵasy Álıhan Baımenovti qabyldady. Bul jaıynda «Egemen Qazaqstan» gazetiniń búgingi sanyndaǵy «Mamandar daıarlaýda sapa qajet» degen taqyryptaǵy maqalada keńinen baıan etilgen. Basylymnyń jazýyna qaraǵanda, kezdesý barysynda Á.Baımenov Memleket basshysyna agenttiktiń aldaǵy qyzmetiniń negizgi baǵyttary men halyqaralyq sarapshylar tarapynan joǵary baǵa alǵan memlekettik qyzmettiń qazaqstandyq modeliniń qalyptasqan aspektileri týraly baıandady. Qazaqstan Prezıdenti memlekettik qyzmetti reformalaýdyń negizgi kezeńderiniń biri «A» korpýsyn jáne tıisti sapaly kadrlar rezervin jasaqtaý ekenin atap ótti. «Osy oraıda memlekettik qyzmetshilerdi daıarlaý jáne biliktiligin arttyrý máselelerine nazar aýdarý qajet. Oblystarda onyń qyzmetine jetkilikti qadaǵalaý jasamaıtyn jergilikti ákimdikterge baǵynystaǵy memlekettik qyzmetshilerdi oqytýdyń óńirlik ortalyqtary bar. Nazar aýdarýdy talap etetin taǵy bir baǵyt - memlekettik qyzmetshilerdi shetelderde oqytý jáne biliktiligin arttyrý. Qajetti bilim qory, daıyndyqtary bar adamdardy jiberýdiń ornyna ol jaqqa kóbinese aǵylshyn tilin bilmeıtinder jiberiledi. Osynyń saldarynan olar materıaldy ıgere almaıdy jáne tıisti tájirıbe jınaqtaı almaıdy. Bul maqsattarǵa bıýdjetten 170 mln. teńge bólingen, al nátıje joq», - dedi Memleket basshysy.
***
«Ekonomıka jáne bıýdjettik josparlaý mınıstri Erbolat Dosaev jyljymaıtyn múlikke salynatyn salyqty arttyrý jaǵdaıǵa para-par jáne der kezindegi shara dep esepteıdi. «Bul búgingi ahýalǵa jaýap beretin naǵyz para-par shara» dep atap kórsetti mınıstr»,- dep jazady «Egemen Qazaqstan» gazeti. Basylymnyń jazýynsha, Erbolat Dosaev salyq salý júıesindegi taǵy bir jańalyqty - jyljymaıtyn múliktiń kólemine baılanysty salyqty ósirý jaıyn da tilge tıek etti. «Óte qymbat páterler (kólemi 150 sharshy metrden asatyn páterler jáne jalpy kólemi 300 sharshy metrden asatyn jeke menshik úıler) salyq tóleýshiler úshin qymbatqa túsetin bolady. Biz osyndaı sanattaǵy turǵyn úılerge tólenetin salyq stavkasyn úsh koeffıtsıentten joǵary esepteýdi usynamyz. Mundaı turǵyn úıler bizde kóp emes. Qazir elimizde jalpy 2,14 mıllıon páter bolsa, onyń ishinde 10,1 myńynyń ǵana kólemi 150 sharshy metrden asady. Jeke turǵyn úıler 2,6 mıllıon bolsa, onyń ishinde 300 sharshy metrden asatyny 34 myń turǵyn úı», dep qorytyndylady óz sózin Erbolat Dosaev. Tolyǵyraq «Jaıly turmystyń aqysy da saıly» degen taqyryppen berilgen.
***
«Qazaqstannyń tóbesinen tek áskerı maqsatta ǵana qoldanylatyn ýly geptıl shashyp kele jatqan «Protondardyń» ushýyna tyıym salynýy tıis! Keshe Senat pen Májilistiń bir top depýtaty Úkimet basshysy Serik Ahmetovtiń atyna birlesken suraý joldady»,- dep jazady «Aıqyn» gazeti búgingi nómirindegi «Aýyldyń muńy bir bólek» degen taqyryptaǵy maqalasynda. Basylymnyń jazýynsha, halyq qalaýlylaryn osyny talap etýge halyqtyń muń-zary ıtermelep otyr: osynyń aldynda, jazǵy demalystary kezinde olar sol óńirdi aralap, qater aımaǵynda ómir súrip jatqan jurtshylyqtyń pikirin tyńdapty. «Bıylǵy jyldyń 2 shildesi kúni Reseıdiń «Proton» zymyrany apatqa ushyrap, «Baıqońyr» ǵarysh aılaǵy aýmaǵyna qulady, - dep eske saldy resmı saýaldy oqyǵan senator Murat Baqtııaruly. - Soǵan baılanysty, komıssııa qurylyp, kóp jumys jasap jatyr. Biz bir top depýtat osy óńirge attanyp, Baıqońyr, Tóretam, Aqaı eldi mekenderinde bolyp, halyqpen kezdesýler ótkizdik. Solardyń qorytyndylary boıynsha Úkimet basshysynan bir top is-sharalardy qolǵa alýyn suraımyz».
Osy basylymnyń jazýynsha, qyrǵyz astanasy Bishkekte Shanhaı yntymaqtastyq uıymynyń kezekti sammıti ashyldy. Bul basqosýda tilge tıek eter másele burynǵyǵa qaraǵanda sál ózgesheleý. Oǵan sebep te bar. Óıtkeni halyqaralyq jaǵdaı ýshyǵyp tur. Bul jerde aldymen tilge oralary - Sırııa máselesi. AQSh tek urymtal sátti kútýde. Eger de soǵys bastala qalsa, tutas Taıaý Shyǵys otqa oranýy múmkin. Munyń arty alpaýyt elderdiń jańa teketiresine, aıaǵy «qyrǵı-qabaq soǵys» kezeńine alyp kelmek. «Tipti Reseı basshysy Pýtın qyzdy-qyzdymen «AQSh Sırııaǵa soqqy beretin bolsa, bul basqynshylyq dep sanalady. Ondaı bols, biz sol elge kómek beremiz» dedi. AQSh-tyń NATO boıynsha keıbir odaqtastary «Sırııa máselesin qalaı sheshýdi BUU-nyń Qaýipsizdik keńesi bekitken jón» degendi aıtady. Biraq AQSh ońaılyqpen eshkimdi tyńdar túri joq. Qoldaryndaǵy «Bashar Asad bıligi beıbit halyqqa hımııalyq qarýdy qoldandy» degen aqıqaty kúmándi dáıekti alǵa tartýmen áýre. Al osyndaı qym-qýyt kezeńde Bishkektegi sammıttiń negizgi taqyryby da qaýipsizdik máselesi bolmaq», - dep jazady «Aıqyn» gazeti. Maqala «Bishkek sammıti jańa músheler qabyldaýǵa ázir me?» degen taqyryppen berilgen.
***
«Keshe Qazaqstan Prezıdenti Nursultan Nazarbaev Reseı Federatsııasynyń Syrtqy ister mınıstri Sergeı Lavrovty qabyldady», - dep jazady «Kazahstanskaıa pravda» gazeti. Basylymnyń jazýyna qaraǵanda, Memleket basshysy S.Lavrovtyń Qazaqstanǵa saparyna yqylas bildirip, elderimiz arasyndaǵy yntymaqtastyqtyń joǵary deńgeıine toqtalyp ótti. «Qazaqstan men Reseı joǵary deńgeıde qarym-qatynas jasap keledi. Buǵan elderimizdiń syrtqy ister mınıstrlikteri men elshilikteriniń qosqan úlesi zor. Bizdiń ekijaqty yntymaqtastyǵymyz ózge elder úshin úlgi bola alady dep oılaımyn», - dedi Nursultan Nazarbaev.
Sondaı-aq, Qazaqstan Prezıdenti Reseı Syrtqy ister mınıstrin G20 sammıtiniń sátti ótýimen quttyqtap, osynaý aýqymdy is-sharanyń sapaly uıymdastyrylǵanyn atap ótti.
