Bishkek-Novosibir poıyzynda 3,5 keli gashıshpen Qyrǵyzstan azamaty ustaldy - UQK
ASTANA. 3 jeltoqsan. QazAqparat - 3,5 keli gashısh alyp ótpek bolǵany úshin Bishkek-Novosibir poıyzynda Qyrǵyzstan azamaty ustaldy.
Bul týraly Qazaqstannyń Ulttyq qaýipsizdik komıtetiniń baspasóz qyzmetinen habarlady.
Shekara qyzmetiniń «Soltústik» aımaqtyq basqarmasynyń «Aýyl temirjol stansysy» shekaralyq baqylaý bóliminiń narıady keshe, 2 jeltoqsan kúni «Bishkek-Novosibir» poıyzy vagondarynyń biriniń tambýryndaǵy qupııa jerden ıisshil ıttiń kómegimen esirtki zatyn tapty. Álgi zattyń jalpy salmaǵy 3,5 keli gashısh ekeni anyqtalyp, esirtki zattaryn tasymaldady degen kúdikpen Qyrǵyz Respýblıkasynyń azamaty ustaldy. Bul fakti boıynsha tergeý amaly júrgizilip jatyr.
Qazaqstandyq shekarashylar jyldyń basynan beri 3 tonnadan astam esirtki zattaryn tárkiledi, onyń 34 keliden astamy - geroın.
