Bishkek meıramhanasynda 318 adam astan ýlandy
BІShKEK. Kabar - QazAqparat – Qyrǵyzstanda «Pıtstsa ımperııasy» meıramhanalar jelisinde 318 adam tamaqtan ýlandy, dep habarlaıdy QazAqparat Kabar agenttigine silteme jasap.
Zerthanalyq taldaý nátıjeleri boıynsha roll-sýshılerdiń daıyn óniminde salmonella bary anyqtaldy. Bul týraly Bishkektiń Memlekettik sanıtarlyq-epıdemıologııalyq qadaǵalaý ortalyǵynyń bas dárigeri Quban Qundashev málim etti. Aldyn ala málimetke sáıkes, salmonella aqserke balyǵynan tabylǵan.
«Meıramhanalar jelisinde bir jetkizýshi bolǵan. Múmkin, balyqtyń búkil partııasy sondaı bolǵan. Qazir «Pıtstsa ımperııasy» meıramhanalar jelisi barlyq jaǵdaı anyqtalǵanǵa deıin japon taǵamdaryn daıyndamaıdy», - dedi ol.
Bishkek qalasy men Shý oblysynyń densaýlyq saqtaý uıymdaryna tamaqtan ýlaný shaǵymymen medıtsınalyq kómekke júgingenderdiń jalpy sany 318 adamdy qurady. Bishkek qalasynda astan jappaı ýlanýdyń sońǵy jaǵdaıyna baılanysty Memlekettik sanıtarlyq-epıdemıologııalyq qadaǵalaý ortalyqtarynyń mamandary respýblıka boıynsha tamaqtaný oryndaryna tekserý júrgizedi.
