Bishkek mańyndaǵy ushaq qulaǵan jerge Qyrǵyzstan premer-mınıstri keldi
BІShKEK. QazAqparat - «Manas» áýejaıy mańyna júk ushaǵy qulaǵan orynǵa Qyrǵyzstan premer-mınıstri Sooronbaı Jeenbekov keldi, dep habarlady Bishkekten «QazAqparat» HAA menshikti tilshisi.
Sońǵy derekterge sáıkes, qaza bolǵandar sany 32-ge jetti, 15-ke jýyq úı qırady. Júk ushaǵyndaǵy órt aýyzdyqtaldy. «Manas» áýejaıynyń jumysy toqtatyldy. Oqıǵa bolǵan aımaqqa aparatyn joldyń barlyǵy jabyldy.
12 adam zardap shekti. Onyń ishinde bes bala bar, olar Bishkek travmotologııa, ortopedııa ortalyǵyna, Bishkek jedel medıtsınalyq járdem qalalyq balalar klınıkalyq aýrýhanasyna jetkizildi.
Eske salsaq, 16 qańtarda saǵat tańǵy 7.31-de Bishkektiń Dacha-Sýý aýylynda áýejaıǵa jaqyn jerde Gonkongten Túrkııaǵa bet alǵan júk ushaǵy qulady. Avıalaıner «Manas» áýejaıynan maı quıýdy josparlaǵan. Alaıda aýa raıynynyń qolaısyzdyǵy saldarynan ol apatqa ushyrady.
