Bishkek Qazaqstannyń kómirinen bas tartýdy josparlap otyr
BІShKEK. QazAqparat - Kelesi jyldan bastap Bishkek tek Qyrǵyzstannyń óndirgen kómirimen jylytylady dep josparlanyp jatyr. Bul týraly osy eldiń ulttyq energoholdınginiń basshysy Aıbek Qalıev málim etti.
Mamandardyń aıtýynsha, bul - Bishkek qalasynyń jylý elektr ortalyǵyna qytaılyq kompanııanyń júrgizgen kúrdeli jóndeý jumystarynan keıin múmkin bolǵan.
Eger budan buryn JEO 512 megavatt óndirýge eseptelip, sońǵy kezde óz kólemin 300 megavattqa deıin qysqartsa, jóndeý jumystarynan keıin onyń múmkindigi 812 megavattqa deıin ósken.
Aıta keteıik, bıyl 450 myń tonna Qazaqstan kómirin satyp alý josparlanǵan. Alaıda, kelesi jylytý maýsymynan bastap Bishkek bıligi Kara-Keche ken ornynda óndiriletin otandyq kómirdi ǵana paıdalanýǵa nıetti.
