Bishkek qalasynyń janynda lańkestik topty joıý úshin arnaıy operatsııa júrgizilýde
BІShKEK. 5 qańtar. QazAqparat /Arnur Rahymbekov/ - Búgin kúnniń ekinshi jartysynda Bishkek qalasynyń syrtynda, Arashan aýylynda Qyrǵyzstan Respýblıkasy Іshki ister mınıstrliginiń úsh qyzmetkerin óltirdi degen kúdiktilerdi qolǵa túsirý boıynsha Qyrǵyzstan arnaıy qyzmetiniń operatsııasy bastaldy.
Esterińizge sala keteıik, 4 qańtar kúni keshke Bishkek qalasynda avtomatty qarýdan úsh mılıtsıonerdi atyp ketken bolatyn. Radıkaldyq ıslam tobyna aýyr qylmysty jasady degen aıyp taǵylyp otyr, olardyń 2010 jyldyń jeltoqsan aıynda Sport saraıynyń janynda bolǵan jarylysqa qatysy bolýy da múmkin.
Búgin Shý oblysy Alamúdin aýdany Arashan aýylyna jaqyn jerdegi saıajaı birlestigi aýdanynyń mańynda kúsh qurylymdary qyzmetkerleri qylmyskerler tobyn tapty. Qylmyskerler bos turǵan úıge tyǵylyp, qatty qarsylyq bildirgen. Atys kezinde «Alfa» arnaıy bólimshesiniń qyzmetkerine oq tıip, kóz jumdy.
Qyrǵyzstan Respýblıkasy ulttyq qaýipsizdik memlekettik komıteti tóraǵasynyń orynbasary, lańkestikke qarsy ortalyqtyń dırektory Marat Imanqulov «24.kg» agenttigine jıhadshylar tyǵylǵan úıde jarylys bolǵanyn habarlady. Aldyn ala aqparat boıynsha, qylmyskerlerdiń biri ózin jaryp jibergen. «Biz úsh qylmyskerdi alyp shyqtyq. Olardyń ekeýi óltirildi. Úıdiń ishine áli kire alǵan joqpyz. Ǵımarat janyp jatyr», - dep atap ótti Marat Imanqulov.
Bishkektiń ózinde qaýipsizdik sharalary kúsheıtilip, quqyq qorǵaý organdarynyń qyzmetkerleri kúsheıtilgen keste boıynsha jumys isteýde.
