Bishkek qalasy mańynda terrorıstiń kózi joıyldy
BІShKEK. QazAqparat - Bishkek qalasy mańynda halyqaralyq lańkestik uıymy múshesiniń kózi joıyldy, dep habarlady Qyrǵyz Respýblıkasy Ulttyq qaýipsizdik memlekettik komıtetiniń (UQMK) baspasóz qyzmeti.
Atap ótilgendeı, Bishkek mańynda 2016 jylǵy 29 tamyzda Qyrǵyz Respýblıkasynyń ulttyq qaýipsizdik organdary lańkestikke qarsy sharalar barysynda 1977 jyly týylǵan, halyqaralyq terrorıstik uıymynyń jasyryn uıasy múshesin anyqtady.
Arnaıy operatsııa barysynda ol QR UQMK qyzmetkerlerine belsendi qarýly qarsylyq kórsetti. Atys barysynda onyń kózi joıyldy.
Lańkesti tintý barysynda odan «Saıga» karabıni, qoldan jasalǵan jarylǵysh qurylǵy, kóptegen oq-dáriler tabylyp, tárkilendi.
QR UQMK organdary qylmystyq is qozǵady. Tıisti tergeý-jedel sharalary júrgizilýde.
