Bishkek bazarynda ólgen maldyń etin satqan
BІShKEK. QazAqparat - Bishkektiń Osh bazarynda ólgen maldyń etin satatyn astyrtyn oryn óz jumysyn 10 jyldan astam ýaqyt júrgizip kelgen. Bul týraly Qyrǵyzstan astanasynda 19 jeltoqsan kúni ótken baspasóz konferentsııasynda azamattyq belsendiler málimdegen, dep habarlaıdy «QazAqparat» HAA-nyń Bishkektegi tilshisi.
Abyrjyǵan azamattar men Osh bazaryndaǵy jumysshylardyń qońyraýynan keıin, belsendi Renat Samýdınov, jýrnalıst Elnýra Moldokadyrova men jergilikti telearnanyń túsirilim toby zertteý júrgizip, Bishkek bazarlaryndaǵy sapasyz et satatyn jáne qaıta óńdeıtin oryndardy anyqtaǵan.
«Biz ólgen janýarlar etiniń aınalymyn baqylaımyz dep kóz ilmesten birneshe tún ótkizdik. Bul aýrý janýarlar nemese mashına qaǵyp ketken nemese qasqyrlar, shıbóriler tistep alǵan maldar. Bul - qaldyqsyz óndiris... Barlyq ishki dene múshelerdi, ıaǵnı ókpe, baýyr jáne basqa da organdaryn belgisiz Chınarbekke 10-15 somǵa satady. Ol sosıskaǵa arnalǵan farsh jasaıdy. Bul bazardyń artynda «úlken» kisiler tur», - dep habarlaıdy E.Moldokadyrova.
Baspasóz konferentsııasyn uıymdastyrýshylar jergilikti ákimdiktiń qurǵan komıssııasy tek eseppen shektelip, jaǵdaı ózgerissiz qalady dep qorqyp, Qyrǵyzstan Prezıdenti Almazbek Atambaevqa qatań baqylaýyna alýyn ótingen. Qyrǵyzstan Respýblıkasynyń birinshi vıtse-premer-mınıstri Mýhammetkalyı Abýlgazıev jýrnalıstik zertteýdi tolyq qarap shyǵyp, sheneýnikterden bir aptanyń ishinde Osh bazaryn retke keltirip, osyndaı istermen aınalysatyn laýazymdy tulǵalardy jazalaýyn talap etti.
