Bishkek álemdegi eń aýasy las qalalar tiziminde kósh bastap tur
ASTANA. QazAqparat – Aýa sapasy reıtıngin jarııalaıtyn www.iqair.com saıtynyń málimetinshe, Bishkek aýanyń lastanýy boıynsha álemde birinshi orynda tur, dep habarlaıdy QazAqparat.
Saıt málimetinshe, Bishkektegi aýanyń lastanýy – 306 AQI (aýa sapasynyń ındeksi), bul «qaýipti» deńgeıge sáıkes keledi.
Ekinshi orynda Bangladeshtiń Dakka qalasy tursa (179 AQI), úshinshi orynda Delı (Úndistan) – 176 AQI. Bul qalalarda aýanyń tazalyq kórsetkishi «zııandy» dep baǵalandy.
Sondaı-aq, tizimniń alǵashqy «ondyǵyna» Kalkýtta (Úndistan), Karachı (Pákistan), Mýmbaı (Úndistan), Akkra (Gana), Baǵdad (Irak), Tashkent (Ózbekstan) jáne Lahor (Pákistan) kiredi.
Ekologterdiń aıtýynsha, qala atmosferasynyń lastanýyna qalada taýdan keletin jeldi jaýyp tastaǵan kópqabatty úılerdi kóptep salý, sondaı-aq qysta jergilikti turǵyndardyń kómir jaǵýy sebep bolyp otyr.
