Bıshimbaevtyń isi boıynsha negizgi sot talqylaýy qashan ótetini belgili boldy
ASTANA. QazAqparat - Astana qalasynyń soty burynǵy mınıstr Qýandyq Bıshimbaevtyń isine qatysty negizgi sot talqylaýy qashan ótetinin jarııalady, dep habarlaıdy «QazAqparat» HAA tilshisi.
«Bıshimbaev pen osy iske qatysty ózge de adamdardyń isi boıynsha negizgi sot talqylaýy 7 qarashada ótedi. Otyrys saǵat 10:00-de bastalady. Talqylaý ashyq sot otyrysy tártibinde ótedi», - dep habarlaıdy qalalyq sottyń baspasóz qyzmeti.
Eske sala ketsek, 2017 jyldyń 10 qańtarynda Sybaılas jemqorlyqqa qarsy Ulttyq bıýro burynǵy Ulttyq ekonomıka mınıstri Qýandyq Bıshimbaevtyń ustalǵanyn habarlaǵan bolatyn. Ulttyq bıýrodan málim etkendeı, ol birqatar adammen aldyn ala kelisip, iri kólemde birneshe márte para aldy dep aıyptalýda.
Bıshimbaev Qyzylorda qalasynda áınek shyǵaratyn jáne óńdeıtin zaýyt salý barysynda «Orda Glass» JShS-nyń vedomstvolyq baǵynystaǵy kompanııasy men onyń merdigerlik uıymy «Shymkenthımmontaj» JShS arqyly 1 mlrd teńge jymqyrý qylmystyq shemasyn uıymdastyrdy degen kúdikke ilindi. 12 qańtar kúni Astana qalasy Almaty aýdandyq №2 soty Qýandyq Bıshimbaevqa qatysty ony «qamaýǵa alý» týraly sanktsııa berdi. Tergeý nusqasy boıynsha, Bıshimbaev zańsyz jolmen alǵan aqshalaı qarajattaryn jeke qajettilikterine jumsaǵan.
Bıshimbaev Prezıdenttiń Jarlyǵymen 2016 jyldyń 28 jeltoqsanynda mınıstr qyzmetinen bosatyldy. Ol bul laýazymda segiz aı jumys istedi. 2013 jyldyń 30 mamyrynan 2016 jyldyń 5 mamyryna deıin «Báıterek» Ulttyq basqarý holdıngi» AQ-nyń basqarma tóraǵasy boldy.
