Bıshimbaevtiń isi: Shyny zaýytynyń qurylysy áli qozǵalmaı tur
ASTANA. QazAqparat - Qazaqstannyń damý bankiniń basshysy Bolat Jámishevtiń aıtýynsha, eki aptadan keıin Qyzylorda qalasyndaǵy shyny zaýytynyń qurylysy jalǵasýy múmkin, dep xabarlaıdy QazAqparat tilshisi.
"Zaım alǵan kompanııa texnıkalyq aýdıt ótkizip, oryndalmaı qalǵan jumystardyń kólemin baǵalady. Qazir "Orda Glass"-qa jańa basshy taǵaıyndaldy. Ótken aptada bolǵan kezdesý kezinde ol eki aptanyń ishinde merdigerlerdiń tizimin usynatynyn jetkizdi. Merdigerlerdiń ishinde sheteldik kompanııalar da bar. Búginde olar zaýytty aıaqtaýǵa qajetti qarjynyń kólemin, belgilengen soma jete me, joq pa, sony ózara talqylap jatyr. Eki aptadan keıin sheshim shyǵady dep oılaımyn. Sol kezde nysannyń qurylysy jalǵasady", - dedi Jámishev búgin Astanada ótken baspasóz máslıxatynda.
Aıta keteıik, jyldyń basynda Qyzylorda qalasyndaǵy shyny zaýytynyń aqshasyn jymqyrdy degen aıyppen burynǵy ulttyq ekonomıka mınıstri Qýandyq Bıshimbaev ustalǵan bolatyn. "Ol "Báıterek" xoldıngin basqarǵanda "Orda Glass" JShS jáne onyń merdiger uıymy "Shymkenthımmontaj" JShS arqyly 1 mıllıard teńge jymqyrýdyń qylmystyq josparyn qurǵan. Qylmystyq josparǵa atalǵan uıymdardyń jetekshileri D.Ibrashev , J.Isabek jáne M.Kojabaev tartylǵan", - delingen Sybaılas jemqorlyqqa qarsy ulttyq bıýronyń resmı xabarlamasynda. Atalǵan somanyń 2 mıllıon dollaryn Bıshimbaev óziniń inisi S.Nurlybek arqyly alǵan.
