Bıshimbaev mınıstrlikte myńǵa jýyq qyzmet ornynyń bos turý sebebin aıtpady

ASTANA. QazAqparat - QR Ulttyq ekonomıka mınıstri Qýandyq Bıshimbaev ózine qarasty vedomstvoda myńǵa jýyq jumys ornynyń ne sebepti bos turǵanyn aıta almady.

Búgin Úkimet otyrysynan keıin ol osy máselege qatysty suraqqa jaýap berýden bas tartty, dep xabarlaıdy QazAqparat tilshisi.

Aıta keteıik, jaqynda QR Memlekettik qyzmet isteri jáne sybaılas jemqorlyqqa qarsy kúres agenttiginiń keńeıtilgen májilisinde Prezıdent Ákimshiliginiń basshysy Ádilbek Jaqsybekov uzaq ýaqyt boıy bos oryndardy ustap, jumysqa adam almaı jatqan mınıstrlikterdi synǵa aldy. Onyń pikirinshe, atalǵan memlekettik organdar rezervte bar adamdardy qyzmetke qoıýǵa asyqpasa, ondaı vedomstvonyń shtatyn qysqartý qajet. Máselen, qarjy mınıstrliginde 970 qyzmet orny bos tursa, ulttyq ekonomıka mınıstrliginde - 900-den astam, al aýyl sharýashylyǵy mınıstrliginde 280 qyzmetke áli adam ala qoımaǵan. Nege ol oryndar bos tur? Bálkim, sol mınıstrlikterdiń shtatyn qysqartamyz. Sonyń arqasynda biraz aqshany únemdeýge bolady", - dep atap kórsetti Prezıdent Ákimshiliginiń basshysy.

"Maǵan túsinik bermesem bola ma? Meniń basqa jumystarym bar. Búgin básekelestik máselesi qaraldy. Sondyqtan kommentarıı bermeı-aq qoıaıyn. Qazir ýaqytym joq", - dedi Q.Bıshimbaev ketip bara jatyp. 
Buǵan deıin aýyl sharýashylyǵy mınıstrligi osy máselege qatysty túsinikteme bergen bolatyn.  Sondaı-aq, búgin Úkimet otyrysynan keıin qarjy mınıstri Baqyt Sultanov ta mınıstrliktiń shtatyn qysqartýǵa qatysty óz pikirin bildirgen edi.