Bıshimbaev qylmysyn moıyndamaı otyr - Ulttyq bıýro
ASTANA. QazAqparat - Qýandyq Bıshimbaev qylmysyn moıyndamaı otyr. Bul týraly búgin Sybaılas jemqorlyqqa qarsy is-qımyl ulttyq bıýrosy qyzmetiniń aǵymdaǵy jyldyń 9 aıyndaǵy jumys qorytyndysyna arnalǵan brıfıngte vedomstvoǵa qarasty Tergeý departamenti dırektorynyń orynbasary Olesıa Keksel aıtty, dep habarlaıdy QazAqparat.
Onyń dereginshe, burynǵy Ulttyq ekonomıka mınıstri Qýandyq Bıshimbaevtyń ústinen qozǵalǵan qylmystyq is 50-den astam tomnan turady. 23 kúdiktiniń tek úsheýi ǵana ózderiniń kináli ekendigin moıyndamaǵan. Onyń ishinde Bıshimbaev ta bar. Tergeý barysynda ol ózin qorǵaý úshin eshqandaı kýálik, dálel jáne qujattar kórsetpegen. Sonymen qatar onyń baýyry Nurlybek Sultan men qurylys kompanııasy qyzmetkerleriniń biri de kinásin moıyndamýda.
«Qylmystyq is boıynsha keltirilgen shyǵyn tolyqtaı qalpyna keltirildi. Buǵan qosa, kúdiktilerdiń 1 mlrd teńgeden astam múlki buǵattaldy. Atalǵan múlikterdi tárkileý sotta qaralatyn bolady. Para retinde alynǵan 366 mln teńge respýblıkalyq bıýdjet kirisine aýdaryldy. Ony Jaqsybaevtyń («Baıterek development» AQ burynǵy basqarma tóraǵasy) týǵan-týystary men dostary aýdardy. Al shyny zaýytyna keltirilgen shyǵyndar ózge fıgýranttar tarapynan ótedi. Shyǵyndy óteýge Bıshimbaev qatysqan joq», - dedi ol.
Kekseldiń sózine qaraǵanda, Bıshimbaev paraǵa alǵan aqshaǵa Astananyń mańyndaǵy Qosshy eldi mekeninen aýmaǵy 500 sharshy metrli, quny shamamen 400-500 myń dollar bolatyn úı salǵan.
