Bıshimbaev: Qazaqstanda 23,6 mln. tonna astyq bastyryldy

ASTANA. QazAqparat - 23,6 mln. tonna astyq bastyryldy. Bul týraly búgin Úkimettiń selektorlyq rejımdegi otyrysynda elimizdiń 9 aıdaǵy áleýmettik-ekonomıkalyq damýy jaıynda baıandama jasaǵan Ulttyq ekonomıka mınıstri Qýandyq Bıshimbaev málim etti, dep habarlaıdy QazAqparat.

«Ósimdik sharýashylyǵy ónimderin óndirýdiń 7,0 paıyzǵa ulǵaıýynyń esebinen aýyl sharýashylyǵy ónimderiniń ósýi 4,9 paıyzdy qurady. Mal sharýashylyǵy ónimderiniń shyǵarylymy 2,5 paıyzǵa ósti. Aǵymdaǵy jyly dándi daqyldardyń rekordty ónimi jınaldy. 24 qazandaǵy jaǵdaı boıynsha gektarynan 15,4 tsentner ónimdilik kezinde 23,6 mln. tonna astyq bastyryldy. Bul ótken jylǵy deńgeıden gektaryna 2,4 tsentnerge joǵary», - dedi Bıshimbaev.

Onyń aıtýynsha, Mańǵystaý oblysynda aýyl sharýashylyǵy ónimderiniń óndirisi 12,3 paıyzǵa tómendegen. Al, qalǵan oblystardyń barlyǵynda ósim tirkelip otyr.

«Eń joǵary ósim Aqmola oblysynda - 13,1, Qostanaı oblysynda - 7,9 jáne Batys Qazaqstan oblysynda 6,8 paıyz deńgeıinde baıqaldy», - dedi mınıstr.