Bıshimbaev isi: Sýdıa sotqa qatysýshylarǵa eskertý jasady
ASTANA. QazAqparat - Burynǵy mınıstri Qýandyq Bıshimbaevtyń isi boıynsha sýdıa Ádilhan Shaıhıslamov sot protsesine qatysýshylarǵa eskertý jasady, dep habarlaıdy «QazAqparat» HAA tilshisi.
Sot barysynda Aslan Jaqypovtyń advokaty Galına Álimǵojına birqatar BAQ-tyń materıaldaryna qatysty óziniń oıyn bildirdi. Onyń paıymdaýynsha, ol materıaldar protsess barysyna áserin tıgizýi múmkin.
«Tilshi meniń qorǵaýymdaǵy Jaqypovtyń «Panama qujattarynda» bar ekenin jazady. Atalǵan málimet shyndyqqa sáıkes kelmeıdi. Sóıtip ol sotty jańyldyrady», - deıdi advokat Álimǵojına.
Al Qýandyq Bıshimbaevtyń advokaty Sálimjan Mýsın da bul máselege qatysty óziniń kózuarasyn bildirdi. Ol tilshi sot zalynda sottalýshylardan jaýap alý kezinde belgili bolǵan faktilerge súıene otyryp, boljaý mazmunynda maqala jaza alýǵa quqyly ekendigin aıtady.
«Tilshi qatysýshylardyń, sonyń ishinde Mýsınniń jaýabyn naqty keltirgen. Onda sot zalyndaǵy sóz jazylǵan. Tilshi boljam boıynsha dep jazady. Meniń oıymsha, ol óziniń ustanymyn bildire alady, sondyqtan mundaǵy memlekettik aıyptaýshynyń maqalanyń dáıeksiz málimetteri týraly aıtýy negizsiz dep esepteımin. Bul málimetter sot talqylaýy barysynda qatysýshylardan alynǵan jaýap negizinde keltirilgen. Ne aıtyldy - sol jazyldy», - deıdi qorǵaýshy.
Óz kezeginde sýdıa Ádilhan Shaıhıslamov advokattarǵa barlyǵyna tek sottyń baǵa bere alatynyn eske saldy.
«Sot osyndaǵy barlyq kýágerlerdiń jaýabyna baǵa beredi. Men qandaı da bir ótinish bermeý týraly protseske qatysýshylardyń barlyǵyna resmı túrde aldyn ala eskertý jasaımyn», - deıdi sýdıa Shaıhıslamov.
Eske sala ketsek, 10 qańtarda Sybaılas jemqorlyqqa qarsy Ulttyq bıýro burynǵy Ulttyq ekonomıka mınıstri Qýandyq Bıshimbaevtyń ustalǵanyn habarlaǵan bolatyn. Ulttyq bıýrodan málim etkendeı, ol birqatar adammen aldyn ala kelisip, iri kólemde birneshe márte para aldy dep aıyptalýda. Bıshimbaev Qyzylorda qalasynda áınek shyǵaratyn jáne óńdeıtin zaýyt salý barysynda «Orda Glass» JShS-nyń vedomstvolyq baǵynystaǵy kompanııasy men onyń merdigerlik uıymy «Shymkenthımmontaj» JShS arqyly 1 mlrd teńge jymqyrý qylmystyq shemasyn uıymdastyrdy degen kúdikke ilindi. 12 qańtar kúni Astana qalasy Almaty aýdandyq №2 soty Qýandyq Bıshimbaevqa qatysty ony «qamaýǵa alý» týraly sanktsııa berdi. Tergeý nusqasy boıynsha, Bıshimbaev zańsyz jolmen alǵan aqshalaı qarajattaryn jeke qajettilikterine jumsaǵan.
