Bıshimbaev isi: Sottalýshylardyń birqatary aıyptaryn moıyndady
ASTANA. QazAqparat - Astana qalasy qylmystyq ister boıynsha mamandandyrylǵan aýdanaralyq sotynda burynǵy mınıstr Qýandyq Bıshimbaevtyń isi boıynsha negizgi sot talqylaýy ótti, dep habarlaıdy QazAqparat tilshisi.
Talqylaý aıasynda prokýrorlar qylmystyq istiń mán-jaıy tolyq sıpattalǵan aıyptaý aktisin jarııalady.
Atap aıtqanda, Qýandyq Bıshimbaevtyń «Báıterek» ulttyq basqarý holdıngi» AQ basqarma tóraǵasy bolǵan kezdegi, «Orda Glass» JShS men «Shymkenthımmontaj» JShS arqyly Qyzylordadaǵy tabaq shyny óndirý jáne óńdeý zaýytynyń qurylysynan bir mıllıard teńgeni jymqyrý boıynsha qylmystyq shemany uıymdastyrǵany aıtyldy.
Aıyptaý aktisine sáıkes, dál osy epızodta Qýandyq Bıshimbaev atalǵan kompanııalardyń múddesin lobbılendirý úshin 2 mıllıon dollar para alǵan. Sondaı-aq, kásiporyn qurylysynan jymqyrylǵan qarajattyń jalpy somasy 1,2 mıllıard teńgeni quraǵan.
Sonymen birge prokýror jaldamaly baspana qurylysy boıynsha memlekettik baǵdarlamany júzege asyrýdaǵy urlyqtar jóninde baıandady. Atap aıtqanda, Bıshimbaev turǵyn úıler qurylysyna qatysqysy keletin kásipkerlerdi óz erejelerin oryndaýǵa májbúrlegen. Osylaısha, ol «Nurly jol» memlekettik baǵdarlamasy aıasynda 346 mıllıon teńge somasyna eseptelgen jeti ret para alǵan.
Aıyptaý aktisi tyńdalǵan soń, sottalýshylarǵa sýdıa suraq qoıdy. Suraqtarǵa jaýap bergen birqatar sottalýshy aqsha jymqyrý men parany alyp berýge qatysqandaryn moıyndady. Olardyń arasynda «Báıterek DEVELOPMENT» AQ burynǵy basqarma tóraǵasy Baqyt Jaqsybaev, onyń orynbasary Aslan Jaqypov, «Báıterek DEVELOPMENT» AQ burynǵy basqarýshy dırektory Delrýh Anarbaı men «Qazaqstannyń ınvestıtsııalyq qory» AQ burynǵy basshysy Erlan Aıtalıev bar.
Olardan bólek, kelisimshart bekitý úshin para bergen kásipkerler de - «Bınym» JShS burynǵy bas ınjeneri Danııar Oljabekov, «Orda Glass» JShS burynǵy basqarma tóraǵasy Dáýren Ibrashev, «Astana PK» JShS dırektory Qanat Smaǵulov qylmys jasaǵandaryn moıyndady.
