Bıshimbaev isi: Memlekettik aıyptaýshy ony 12 jylǵa sottaýdy surady
ASTANA. QazAqparat - Memlekettik aıyptaýshy burynǵy Ulttyq ekonomıka mınıstri Qýandyq Bıshimbaevty 12 jylǵa bas bostandyǵynan aıyrýdy surady, dep habarlaıdy QazAqparat.
Jaryssóz kezinde prokýror Álibek Aıtjanov aıyptalýshynyń menshigindegi qylmystyq jolmen alynǵan múligin tárkilep, 12 jyl bas bostandyǵynan aıyrý jazasyna kesý talabyn bildirdi. Munymen qosa, Q. Bıshimbaevqa qatysty ómir boıy memlekettik organdar men kommertsııalyq uıymdarda basshylyq qyzmetterdi atqarýyna ruqsat etilmeýi suraldy.
Sonymen qatar, QR Prezıdentine eks-mınıstr Qýandyq Bıshimbaevty «Qurmet» ordeninen aıyrý týraly usynys engizý de eskerilgen.
Eske sala ketsek, 2017 jyldyń 10 qańtarynda Sybaılas jemqorlyqqa qarsy Ulttyq bıýro burynǵy Ulttyq ekonomıka mınıstri Qýandyq Bıshimbaevtyń ustalǵanyn habarlaǵan bolatyn. Ulttyq bıýrodan málim etkendeı, ol birqatar adammen aldyn ala kelisip, iri kólemde birneshe márte para aldy dep aıyptalýda.
Bıshimbaev Qyzylorda qalasynda áınek shyǵaratyn jáne óńdeıtin zaýyt salý barysynda «Orda Glass» JShS-nyń vedomstvolyq baǵynystaǵy kompanııasy men onyń merdigerlik uıymy «Shymkenthımmontaj» JShS arqyly 1 mlrd teńge jymqyrý qylmystyq shemasyn uıymdastyrdy degen kúdikke ilindi.
Ótken jyldyń 12 qańtary kúni Astana qalasy Almaty aýdandyq №2 soty Qýandyq Bıshimbaevqa qatysty ony «qamaýǵa alý» týraly sanktsııa berdi. Tergeý nusqasy boıynsha, Bıshimbaev zańsyz jolmen alǵan aqshalaı qarajattaryn jeke qajettilikterine jumsaǵan.
Bıyl qańtarda eks-mınıstr Bıshimbaev isi boıynsha sotta jańa aıyptaý aktisi oqyldy.
Eske sala keteıik, buǵan deıin Qýandyq Bıshimbaev Prezıdent aldynda aıypty ekenin túsinetinin málimdegen edi.
