Bıshi, úrmeli aspap mamany men tsırk ártisterine arnaıy tólem qosý usynyldy

ASTANA. QazAqparat – Mádenıet jáne sport mınıstrligi eńbek ótili 20 jyldan asqan jáne zeınet jasyna tolǵanǵa deıin bıshi, úrmeli aspap mamany men tsırkte istegen ártisterge aı saıyn aqshalaı tólem berýdi usyndy. Bul týraly vedomstvo jarııalaǵan retteýshilik saıasattyń konsýltatıvtik qujatynda jazylǵan, dep habarlaıdy QazAqparat tilshisi.

«Kásibı eńbek ótili keminde 20 jyl bolǵan jáne zeınetkerlik jasqa tolǵanǵa deıin balet ártisi laýazymynda eńbek etken óner adamy aı saıyn arnaıy aqshalaı tólem alýǵa quqyly. Onyń mólsheri sońǵy 3 jyldaǵy ortasha aılyq jalaqysynyń keminde 60%-yn quraıdy. Degenmen, respýblıkalyq bıýdjette qarjy jylyna belgilengen aılyq eseptik kórsetkishtiń 109 eselengen mólsherinen aspaıdy», - dep jazylǵan qujatta.

Osyǵan baılanysty memlekettik uıymdarda qyzmet etetin úrmeli mýzykalyq aspaptarda oınaıtyn mamandar, tsırk ártisteri men bı ansamblderiniń músheleri jıi shaǵym aıtady. Sebebi, olar osyndaı kómek alatyn qyzmetkerler sanatyna jatpaıdy. Sondyqtan, mınıstrlik zańnamaǵa túzetý engizý arqyly aı saıyn arnaıy aqshalaı tólem alatyn mamandar qataryna osy ártisterdi kirgizýdi usynady.

«Belgili bir jasqa jetkende ártisterdiń bul sanatyndaǵy kóptegen adamdar fızıologııalyq jáne estetıkalyq sıpattaǵy erekshelikterine baılanysty zeınetkerlik jasty kútpesten kásipten ketedi. Óıtkeni, 20-25 jyldyq qyzmetten keıin olar kásibı aýrýlarǵa shaldyǵady. Mysaly, úrmeli aspap ártisteri jaq-bet bulshyqet aýrýlaryna shaldyǵady. Bı ansamblderi ártisteriniń kásibı qyzmeti kúrdeliligi jaǵynan balet ártisteriniń jumysynan esh aıyrmashylyǵy joq. Tsırk ártisteri túrli akrobatıkalyq jattyǵýlardy oryndaıdy. Bul olardyń ómiri men densaýlyǵyna qaýip tóndiredi», - delingen mınıstrlik usynysynda.