Bıshi satýshylar Hanoıdaǵy bazarlardyń sánin keltirdi
ASTANA. QazAqparat - Vetnam astanasy Hanoıdaǵy bazarda bıshi satýshylar paıda boldy.
Arnaıy fıtnes zalyna ýaqyty men aqshasy jetpeıtin qyz-kelinshekter týra jumys ornynda jattyǵýlar jasaýdy ádetke aınaldyrǵan, dep habarlaıdy 24.kz.
Hanoı ortalyǵynda Hoankem dep atalatyn kól bar. Munda tańerteńgilik ondaǵan adam júgirip, ıogamen nemese gımnastıkamen aınalysady. Bireýleri japadan-jalǵyz shuǵyldanǵandy jón kórse, keıbiri bir topqa birikken. Jergilikti bazardaǵy qyz-kelinshekterdiń sportpen aınalysýǵa múlde múmkindigi joq. Sebebi saýda tańsáriden bastalady. Biraq birneshe áıel tapqyrlyq tanytqan. «Biz qatty sharshaımyz. Materıaldyq problemalarymyz bastan asady. Oılaıtynymyz tek aqsha ǵana. Sondyqtan osy jumys ornynda shuǵyldanýǵa týra keledi», deıdi 58 jastaǵy satýshy Ngýen Thı Nga.
Osylaısha satýshylar bazardy bı men sport alańyna aınaldyryp jiberdi. Áıtpese kóptegen áıelder «kúni boıy otyrǵannan arqamyz aýyrady» dep jıi shaǵymdanatyn. Tipti aldaryna kelgen klıentter de qarap turmaı, qosa qımyldaı ketedi. Vetnam astanasyndaǵy sportzalda shynyǵý baǵasy aıyna 30-dan 150 dollarǵa deıin jetedi. Al bul somany tóleýge satýshy áıelderdiń shamasy joq. Sebebi olardyń jalaqysy 250 dollardy ǵana quraıdy.
