Bıshi Maııa Plısetskaıa dúnıeden ótti
ASTANA. QazAqparat - Bıshi Maııa Plısetskaıa 2 mamyr kúni Germanııada júrek talmasynan qaıtys boldy. Bul týraly TASS-qa Úlken teatrdyń bas dırektory Vladımır Ýrın habarlady.
«Maǵan balerınanyń jubaıy Rodıon Şedrın telefon soqty. Ol aýyr júrek talmasy dertinen kóz jumdy. Dárigerler onyń ómiri úshin arpalysqanmen, eshteńe shyǵara almady», - dedi Ýrın.
Maııa Mıhaılovna Plısetskaıa 1925 jyly 20 qarashada Máskeýde dúnıege kelgen bolatyn.
1934 jyly Máskeý horeografııalyq ýchılışesin bitirdi. Onyń oqýy aýyr jyldarmen tuspa-tus keldi: Plısetskaıanyń ákesi men sheshesi qýǵyn-súrginge ushyrady, odan keıin soǵys bastaldy, Maııa keıinnen túrmeden oralǵan anasymen birge basqa jerge kóshirildi.
1941 jyly 21 maýsymda Maııa ýchılışe túlekteriniń kontsertinde Úlken teatr fılıalynyń sahnasynda alǵashqy debıýttik óner kórsetti. Eki jyldan keıin 1943 jylǵy 1 sáýirde emtıhandaryn oıdaǵydaı tapsyryp, Úlken teatr trýppasyna qabyldandy.
Keıinnen oǵan Úlken teatrda jetekshi partııalar berile bastady. P.I.Chaıkovskııdiń «Jańǵaq shaqqysh» baletindegi Masha rólin úlken teatrdaǵy alǵashqy jumys maýsymynda bıledi. Budan keıin «Jızeldegi» Mırta, «Kúlbıkeshtegi» feıa Osenı, A.K.Glazýnovtyń «Raımond» baletindegi basty ról, «Don Kıhottaǵy» Kıtrı jáne basqalary.
Maııa Plısetskaıa Úlken teatrda 1988 jylǵa deıin jumys istedi. Onyń «Aqqý kóli», «Tastaǵy gúl», «Uıqydaǵy arý», «Spartak», «Jızel», Raımond» jáne basqa da baletterdegi jetekshi partııalary álemdik balet tarıhyna qosyldy.
Ol sondaı-aq ózin talantty baletmeıtster retinde de kórsete bildi, birqatar kórkem fılmderge de tústi.
Úlken teatrdan keıin birqatar jyldar Rımdegi, Madrıdtegi bedeldi teatrlarda jumys jasady.
Maııa Plısetskaıa RSFSR halyq ártisi, KSRO halyq ártisi, Sotsıalıstik Eńbek Eri, Lenındik syılyqtyń laýreaty, «Otan aldynda sińirgen eńbegi úshin» ordenderiniń tolyq ıegeri. Sonymen qatar kóptegen sheteldik marapattarǵa ıe boldy, Sorbonna doktory, M.V.Lomonosov atyndaǵy Máskeý memlekettik ýnıversıtetiniń qurmetti professory.
