«BIS» konsortsıýmy «PetroQazaqstan» kompanııasynyń Qumkól ken ornyndaǵy zańsyz áreketterin aıyptady
ALMATY. 20 naýryz. QazAqparat - Qytaılyq «PetroQazaqstan» kompanııasynyń aldynda jergilikti ákimshilik organdary dármensizdik tanytýda. Ony «BIS» konsortsıýmynyń Bas dırektory Dildahan Ahmetov búgin Almatyda ótken baspasóz máslıhatynda málimdedi.
«PetroQazaqstan Qumkól Resorız» AQ-y jalaqy mólsherlemesin 2008 jyly - 5, 2010 jyly - 17, 2011 jyly - 11 paıyzǵa qysqartty. 2012 jyly tender boıynsha 13 paıyzǵa qysqartýdy usyndy. Al tender ótetin kúni, ıaǵnı 27 aqpanda bul mólsherlemeni taǵy 30 paıyzǵa tómendetti. Bul talapqa biz kelisken joqpyz. Jumyssyz qalǵan 700-den astam adamnyń 300-den astamy 1 naýryzdan beri vahtalyq orynda jatyr. Osy ýaqytqa deıin olarǵa birde-bir adam jaǵdaı surap kelgen joq», - deıdi D.Ahmetov. Onyń aıtýynsha, olar 2001 jyldan beri «PetroQazaqstan Qumkól Resorız» AQ-nyń menshigindegi Qumkól ken ornynda shıki munaı men sý tasymaldaý boıynsha merdigerlik jumys jasap kelgen bolatyn. Konsortsıýmnyń qyzmetine qatysty qytaılyq jáne onyń aldynda jumys jasaǵan kanadalyq kompanııanyń tarapynan da birde-bir ret shaǵym bolǵan joq. Alaıda QR Tender ótkizý týraly zańyn óreskel buzyp, 700-den astam adamdy jumyssyz qaldyrǵan qytaılyq kompanııaǵa qatysty olardyń shaǵymyn jergilikti atqarý organdary bul sharýashylyq daýy dep oǵan aralasýdan at-tonyn ala qashýda.
