Bırjanyń damýy baǵany naryq zańyna ıkemdeıdi - maman
Bırjalyq baqylaý departamentiniń dırektory Ásel Ortaqbaeva buǵan deıin bırjalyq saýda-sattyqtyń ekonomıkaǵa dendep enýine zańnamanyń jetilmeýi kedergi bolyp kelgenin aıtady.
«Qazaqstanda uzaq jyldar boıy bırjalyq saýda-sattyq naryǵyndaǵy jaǵdaı ashyqtyqtyń, tıisti ashyq naryq baǵasyn belgileýdiń jáne naqty saýda-sattyqtyń bolmaýymen sıpattaldy. Kóptegen taýar bırjalarynda mámileler resmı túrde tirkeldi, biz taýar bırjalarynyń qyzmetin baqylaǵannan keıin osyndaı qorytyndyǵa keldik. Mámileler óte sırek jasaldy, saıttar jumys istemedi, telefon nómirleri jaýap bermedi. Árıne, mundaı jaǵdaıdyń jasalýyna bırjalyq zańnamanyń jetildirilmeýi ǵana emes, sondaı-aq ýákiletti organdar tarapynan ınstıtýtsıonaldyq baqylaýdyń álsizdigi de yqpal etti», - deıdi agenttik ókili.
Al bırjalyq baqylaý departamentiniń basqarma basshysy Berdibek Baıtileýdiń pikiri boıynsha, bıyl bırjalyq saýdany damytý boıynsha úlken jumys júrgizilgen.
«Bırjalyq komıtet qurylyp, naryq qatysýshylaryn bırjalyq saýda-sattyqqa qatysý boıynsha jappaı tegin oqytý uıymdastyryldy. Naqty satýshylar men satyp alýshylardyń qatysýymen iskerlik oıyndar ótkizildi. Bul jumys árbir naryqtyń erekshelikterin eskerýge múmkindik berip qana qoımaı, bıtým, benzın, avıakerosın sııaqty jańa bırjalyq taýarlardyń bırjalyq saýdaǵa kedergisiz kirýine, kommýnaldyq-turmystyq kómirmen bırjalyq saýda-sattyqty tikeleı óńirlik operatorlarǵa shaǵyn partııalarmen aýyrtpalyqsyz qaıta baǵdarlaýǵa yqpal etti», - dedi basqarma basshysy.
Onyń paıymynsha, mundaı tájirıbe naryqtaǵy baǵany barynsha obektıvti ete alady.
«Bırjadan tys baǵalar bırjamen salystyrylady jáne bolashaqta bırjadan tys baǵalar bırjaǵa jaqyn bolady. Bul naryqtaǵy baǵa jaǵdaıyn teńestiredi», - dedi maman QazAqparat tilshisine bergen málimetinde.
