Birjan Jaqypov pen Berik Ábdirahmanov sporttaǵy mansabyn aıaqtady
ASTANA. QazAqparat - Qazaqstandyq boksshylar Birjan Jaqypov pen Berik Ábdirahmanov sporttaǵy mansabyn aıaqtady. Bul týraly Massaget.kz habarlady.
32 jastaǵy Birjan Jaqypov Qazaqstan quramasy sapynda úsh Olımpıada oıyndaryna (2008, 2012 jáne 2016) qatysty. Tórtjyldyqtyń basty dodasynda úsh ret shırek fınalda súringenmen, halyqaralyq jarystarda talaı ret jeńis tuǵyrynan kórindi. 2005 jyly álem chempıonatynyń qola júldegeri, 2010 jáne 2014 jyldary Azııa chempıonatynda kúmis alsa, 2013 jyly Almatyda álem chempıony atandy.
Boksshy aldaǵy ýaqytta Shymkent qalalyq boks mektebi dırektorynyń orynbasary qyzmetin atqarmaq.
Berik Ábdirahmanov ta áýesqoı bokspen birjola qosh aıtysty. Jýyq arada ol kásipqoı boksqa aýysýy múmkin, ne sportty túbegeıli qoıyp jattyqtyrýshylyq qyzmetke bet burýy yqtımal.
Boksshy 60 keli salmaqtyń kóshin 2013 jyly Ǵanı Jaılaýov mansabyn aıaqtaǵannan keıin ustaǵan bolatyn. Aktaýlyq boksshy 2013 jyly Almatyda ótken álem chempıonatynyń qola júldegeri jáne sol jyly Ammanda ótken Azııa chempıonatynyń jeńimpazy. Sonymen qatar ol 2016 jyly Rıo-de-Janeıroda ótken Olımpıada oıyndaryna da qatysty. Biraq, týrnırdiń birinshi aınalymynda amerıkalyq Karlos Baldermastan jeńilip qalǵan edi.
Aıta keteıik, osyǵan deıin ulttyq quramadan Birjan men Berikten ózge Oljas Sáttibaevtyń da ketkeni belgili bolǵan edi. Al Danııar Eleýsinov kásipqoı boksqa aýysty. Sondaı-aq Olımpıadanyń eki dúrkin qola júldegeri Ivan Dychko da jaqyn ýaqytta kásipqoı boksqa aýysýy múmkin.
