«Birjan-Sara» operasynyń sahnasynda sarqyrama qulaıtyn taý turǵyzyldy
ASTANA. Qazaqparat - Muqan Tólebaevtiń «Birjan-Sara» operasy úshin «Astana Opera» teatrynyń sahnasyna shynaıy sarqyrama qulaıtyn taý turǵyzyldy. Bul týraly aqparatty sýretshi-grafık jáne fotograf Karla Nur Feısbýktegi paraqshasynda jarııalady, dep habarlaıdy QazAqparat.
«Endi operanyń barlyq qupııasyn jarııalaı berýge bolady. Teatr sahnasyna shynaıy sarqyrama qulaıtyn taý turǵyzyldy! Sheberlerge myń alǵys! 20 sáýirde Muqan Tólebaevtiń «Birjan-Sara» operasynyń jańartylǵan nusqasy sahnalandy», - dep jazady Karla Nur.
Operanyń qoıýshy-dırıjeri - Abzal Muhıtdınov, qoıýshy-rejısseri - Ashat Maemırov, rejısser-konsýltanty - Mıhaıl Pandjavıdze, qoıýshy-sýretshiler - Sofıa Tasmaǵambetova men Pavel Dragýnov, mýzykalyq redaktory - Tasqyn Jarmuhamet, bas hormeıster - Erjan Dáýitov, qoıýshy baletmeısterler - Tursynbek Nurǵalıev, Aıgúl Tatı, proektsııa boıynsha dızaıner - Serdjıo Metallı, jaryq boıynsha sýretshi - ıAkopo Pantanı, kórkemdik-óndiristik keshen jetekshisi - Vıktor Karare, assıstentter - Erenbaq Toıkenov, Elik Nursultan, Mattııa Metallı, Erbol Bısenov. Oryndaýshy top: Birjan - Meıir Baınesh, Sara - Maıra Muhamedqyzy, Janbota - Janat Shybyqbaev, Analyq - Dına Hamzına, Altynaı - Saltanat Ahmetova, Jıenqul - Erjan Saıpov, Qojaǵul - Evgenıı Chaınıkov, Serik - Ramzat Balakıshıev, Estaı - Jumabek Qańtarbaev.
Teatrdyń baspasóz qyzmeti habarlaǵandaı, uzaqqa sozylǵan daıyndyq ýaqytynda kostıýmder jasaldy, kúrdeli tondyq ýltrazamanaýı dekoratsııalar jasaldy, bul tásilder spektakldi eýrazııa keńistigindegi shynaıy erekshelikke aınaldyrdy. Kórkemdik-óndiristik top qazaq keıipkerlerin qabyldaýdyń stereotıpterin buzyp, kórermenderge múldem jańasha opera usyndy.
Alǵashqy jármeńke sahnasy kórermendi birden baýrap áketti. 3D tehnologııalardy paıdalanýdyń arqasynda tabıǵat pen ómir kórinisteri sahnada tiri qalpynda kórsetilgendeı áser týdyrdy. Aıtýǵa turarlyq dúnıeler qataryna keremet kostıýmder men ıtalıandyq sheberi Serhıo Metallıdiń vıdeoproektsııalaryn qoıaǵa bolady. Al eń bastysy - tamasha mýzyka, solısterdiń ádemi daýysy jáne orkestrdiń úılesimdi dybysy.
- «Birjan-Sara» operasy qazaq operasynyń jaýhar týyndysy bolyp sanalady. Jańa tehnıkalyq múmkindikterdiń arqasynda M.Tólebaevtyń keremet mýzykalyq shyǵarmasynyń arqasynda bul týyndy álemdik opera óneriniń kontekstinde baǵalanýy múmkin», - deıdi Ashat Maemırov.
Mádenıet jáne sport mınıstri Arystanbek Muhamedıulynyń aıtýynsha, 20-30 shildede Muqan Tólebaevtyń «Birjan-Sara» operasy Astananyń 20 jyldyǵyna arnalǵan halyqaralyq opera festıvali aıasynda Open Air formatynda ashyq aspan astynda ótpek. 
