«Birjan-Sara» operasy jańa mýzykalyq-sahnalyq redaktsııada qoıylady

ASTANA. QazAqparat - 20 jáne 21 sáýirde «Astana Opera» teatrynyń Úlken zalynda kórermen nazaryna Qajym Jumalıevtiń lıbrettosyna jazylǵan M. Tólebaevtyń «Birjan-Sara» operasy usynylady, dep habarlaıdy QazAqparat elorda ákimdiginiń saıtyna silteme jasap.

Ulttyq ónerimizdiń jaýhary bolyp sanalatyn operanyń jańa mýzykalyq-sahnalyq redaktsııasy QR Mádenıet jáne sport mınıstrliginiń bastamasymen Astananyń jıyrma jyldyǵyn merekeleý aıasynda kórsetiletin bolady.

Operada ataqty ánshi ári kompozıtor Birjan men daryndy aqyn Saranyń arasyndaǵy súıispenshilik, ónerpazdyń bostandyq úshin, baqytty izdeý jolyndaǵy kúresi anyq kórinis tabady. M. Tólebaevtyń operasynda sýretkerdiń zulymdyq pen ádiletsizdikke qarsy máńgi kúresi týraly ıdeıa alǵa qoıylyp, ónerdiń asqaqtyǵy jyrlanady. 
 

«Bul shyn máninde aýqymdy qoıylym bolmaq. Teatrda úzdiksiz daıyndyq júrip jatyr. Ártister óz partııalaryn jattap alǵan. Endi olardy tyńdaý baıqaýyndaǵy jaýapty sát kútýde. Al biz bolsaq dekoratsııalar men kostıýmder boıynsha jumys jasap jatyrmyz. Spektakldiń biregeıligi onyń kórinisinde, aýqymdy dekoratsııalary men zamanaýı arnaıy áser berý múmkindikterinde jatyr», - deıdi qoıýshy-sýretshi men stsenograf S. Tasmaǵambetova men P. Dragýnov 
   

Qoıýshy-rejısser - PhD doktory, Qazaqstannyń eńbek sińirgen qaıratkeri A. Maemirov jáne rejısserdiń keńesshisi - Belarýs Úlken teatrynyń bas rejısseri Mıhaıl Pandjavıdze.