«Birjan - Sara» operasy kórermenge jańa redaktsııada jol tartady
ASTANA. QazAqparat - Kompozıtor Muqan Tólebaevtyń «Birjan- Sara» operasy «Astana Opera» teatrynda 2018 jyldyń naýryz aıynda jańa redaktsııada kórsetiletin bolady. Bul týraly teatr dırektory Ǵalym Ahmedııarov teatrdyń besinshi maýsymyn tanystyrý barysynda málim etti, dep habarlaıdy «QazAqparat» HAA tilshisi.
Dırektordyń aıtýynsha «Astana Opera» teatrynyń besinshi maýsymy 20 qazanda bastalady. Jańa maýsymda teatr kórermenderi sahnadan Adolf Adannyń «Korsar» baletin, Muqan Tólebaevtyń «Birjan - Sara» operasy men P.Chaıkovskııdiń «Pıkovaıa dama» operasyn tamashalaı alady.
Aıta keterligi, atalǵandardyń ishinde «Birjan- Sara» operasy redaktsııalanyp baryp kórsetilmek.
«2018 jyldyń naýryz aıynda «Birjan Sara» operasyn jańa qalyppen kórsetkimiz keledi. Sahna jáne kórkemdik turǵydan operaǵa ózgerister engiziledi», - deıdi teatr dırektory.
Al «Astana Opera» teatry dırektorynyń birinshi orynbasary Tóleýbek Álpıev «Birjan - Sara» operasyn nelikten jańartylǵaly jatqanyn tilge tıek etti.
«Zaman da, tehnologııa da ózgerdi. Mysaly, bir ǵana Abaı teatrynda «Birjan Sara» osy ýaqytqa deıin 70-80 ret qoıylǵan bolar. Bul operaǵa basqa kózben qarap, jańa redaktsııamen shyǵaraıyn dep jatyrmyz. «Birjan Sara» keńes zamamynda jazylǵan opera ekenin bilesizder. Ol kezdegi ıdeologııa boıynsha moldalardy mazaqtap kórsetkeni belgili. Al qazir operany jańa redakııamen, jańa kózqaraspen kórsetýdi kózdep otyrmyz», - deıdi Tóleýbek Álpıev.
Foto https://astanaopera.kz/
