«Birjan sal» kórkem fılminiń mazmundylyǵy erekshe - T. Muhamedjanov

Bul týraly búgin elordada Dúnıejúzilik rýhanı mádenıet forýmyna baılanysty ótken baspasóz máslıhatynda QR Parlamenti Senatynyń depýtaty, kompozıtor Tólegen Muhamedjanov málim etti.

«Birjan sal» kórkem fılmine mýzyka jazar aldynda men bul týyndyny birneshe márte kórip shyqtym. Meniń pikirimshe, bul bizdiń kınostýdııanyń úzdik fılmderiniń biri. Atap aıqanda, bul týyndyda Birjan sal ómir súrgen kezeńniń naqty kórinisi týra kórsetilgen. Onyń mazmundylyǵy da aıryqsha jáne bul týyndyny halyqtyq fılmder sanatyna jatqyzamyn»,- dedi T. Muhamedjanov.

«Osyǵan oraıda aıtarym, biz «Birjan sal» fılmin Búkilálemdik rýhanı mádenıet forýmy meımandarynyń nazaryna usynatyn bolamyz», - dedi ol.

Bul fılm - belgili kıno akteri Doshan Joljaqsynovtyń rejısser retindegi tuńǵysh týyndysy. Onyń ústine basty rol - Birjan beınesin Doshannyń ózi somdaǵan. Láılim rolinde estrada ánshisi Asha Mataı oınaıdy. Sondaı-aq Jubaı beınesin teatr ártisi Asylbolat Smaǵulov sátti shyǵardy. Tujyra aıtqanda, atalmysh kınoda Qazaqstan halyq ártisi, ult sahnasynyń korıfeıi Sábıt Orazbaevtan bastap Dýlyǵa Aqmolda syndy ónersheberleriniń bári de rejısserdiń oıynan shyǵa bilgen. Birjan saldyń keń tynysty ánderin oryndaý úshin de erekshe talant kerek. Sondyqtan ár taraptan ánshiler shaqyrylyp, súzgiden ótkizilgen. Aqyry Erkin Shúkimanovqa toqtam jasalǵan.

Aıta keteıik, qazannyń 18-20-sy aralyǵynda Astanada Dúnıejúzilik rýhanı mádenıet forýmy ótedi (BRMF). Forýmǵa dúnıeniń ár túpkirinen kóptegen, tanymal ǵalymdar, saıasat jáne qoǵam qaıratkerleri, mádenıet pen óner maıtalmandary jáne de ár eldiń rýhanı jetekshileri qatysady.