Birjan Nurymbetov: jumys oryndaryn qurýdyń óńirlik kartalaryn jasaý kerek

NUR-SULTAN. QazAqparat – Halyqty jumyspen qamtý máselesin tıimdi túrde sheshý úshin aldaǵy ýaqytta jyl saıyn ekonomıkada 600 myńǵa jýyq jumys ornyn qurý qajet. Mundaı mańyzdy qajettilik týraly Eńbek jáne halyqty áleýmettik qorǵaý mınıstri Birjan Nurymbetov aıtyp berdi, dep habarlaıdy QazAqparat tilshisi.

«Jumyspen qamtý máseleleri tek Jumyspen qamtýdyń jol kartasy nemese «Eńbek» baǵdarlamasy ǵana emes, sonymen qatar jalpy ekonomıkada jańa jumys oryndarynyń ashylýyna baılanysty ekenin atap ótý mańyzdy. 2017 jyldan bastap ekonomıkada 1 mıllıonnan astam turaqty jumys oryny qurylǵan. Onyń ishinde basqa memlekettik baǵdarlamalar óz úlesin qosýda. Osy jyly memlekettik baǵdarlamalar sheńberinde 264 myń jumys oryny quryldy. Negizgi úlesti «Nurly jol», «Nurly jer», «Tsıfrlyq Qazaqstan» baǵdarlamasy qosyp otyr», - dedi Birjan Nurymbetov Úkimet otyrysynda.

Mınıstr halyqty jumyspen qamtý máselesin tıimdi túrde sheshý úshin aldaǵy ýaqytta jyl saıyn ekonomıkada 600 myńǵa jýyq jumys ornyn qurý qajettigin atap ótti.

«Ol úshin óńirlerdi damytý baǵdarlamalarynyń quramdas bóligi retinde memlekettik baǵdarlamalardyń barlyq jobalary men iri, jeke ınvestıtsııalyq jobalardy eskere kele jumys oryndaryn qurýdyń óńirlik kartalaryn jasaý qajettiligi týyndaıdy. Bul óz kezeginde barlyq memlekettik baǵdarlamadaǵy jumys oryndarynyń kórsetkishterin jańǵyrtý jáne olardyń ákimshileriniń jaýapkershiligin arttyrýdy talap etedi», - dedi ol.