Birjan Nurymbetov Ulttyq biliktilik júıesiniń túıinin tarqatty
NUR-SULTAN. QazAqparat - 2025 jylǵa deıin Qazaqstannyń Ulttyq biliktilik júıesi halyqaralyq deńgeıde moıyndalatyn bolady. Bul týraly búgin Salalyq kásiptik standarttardy ázirleý máseleleri boıynsha biliktilik jónindegi ulttyq keńes otyrysynda QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.
«Ulttyq biliktilik júıesiniń negizgi maqsaty - elimizde ekonomıkanyń talabyna, eńbek naryǵyna saı sapaly, bilikti kadrlar daıyndaý. Bul júıeniń qurylymy qarapaıym, úsh túıinnen turady. Eń bastysy - bıznes ókilderi, jumys berýshiler bilim berý júıesine sol mamannyń bilimi, biliktiligi, daǵdysy jóninde talabyn qoıýy. Ony kásiptik standart deımiz. Ekinshiden, sol kásiptik standarttarǵa bilim júıesindegi standarttary ne baǵdarlamalary beıimdelýi, bolmasa jasaqtalýy kerek. Úshinshisi, bizde qazir bilim berý oshaǵy ózi oqytady, dıplom beredi. Órkenıetti elderde ony Táýelsiz baǵalaý ortalyqtary beredi. Bizde de sony qurý qajet», - dedi mınıstr.
Onyń dereginshe, ulttyq biliktilik júıesin damytý eki baǵytta júrgizilip jatyr. Birinshi baǵytta bıylǵy jyldyń sońyna deıin el ekonomıkasynyń 12 basym salasy boıynsha 36 salalyq biliktilik sheńberi men 480 kásiptik standarty daıyndalatyn bolady.
«Ekinshi baǵytta strategııalyq is-áreketterimizdi aıqyndaý úshin 2025 jylǵa deıingi Jol kartasyn ázirledik. Jol kartasyna sáıkes sharalardyń eki kezeńi bolady. Birinshi kezeńde biz 2019-2020 jyldary kásiptik standarttardy ázirlep, olardy bilim berý protsesine engizýdi aıaqtaýǵa tıispiz. 2021-2025 jyldary biz zańnamalyq baza qalyptastyryp, biliktilikterdiń halyqaralyq tanylýyn qamtamasyz etýimiz qajet», - dedi Birjan Nurymbetov.
