Birjan Nurymbetov óndiristik jaraqat jaǵdaıy jıi tirkeletin óńirlerdi atady
NUR-SULTAN. QazAqparat – Eńbek jáne halyqty áleýmettik qorǵaý mınıstri Birjan Nurymbetovtiń aıtýynsha, mundaı jazataıym jaǵdaılar Aqmola, Jambyl oblystarynda jáne Nur-Sultan qalasynda jıi baıqalady, dep habarlaıdy QazAqparat tilshisi.
«Osy jyldyń 10 aıynda ókinishke qaraı óndiriste 1 169 adam zardap shegip, onyń ishinde 129 adam qaıtys boldy. Bul 2018 jyldyń osy kezeńimen salystyrǵanda 13 jáne 23 paıyzǵa tómen. Ekonomıka salasy bóliginde jaraqattyń joǵary deńgeıi taý-ken metallýrgııa men qurylys salasynda saqtalýda. Óndiristik jaraqattyń ósýi Aqmola, Jambyl oblystarynda jáne Nur-Sultan qalasynda baıqalady», - dedi Birjan Nurymbetov.
Mınıstr belgilengen máselelerdi sheshý úshin qandaı sharalar qoldanylyp jatqanyn aıtyp ótti.
«Eńbek ınspektorlarynyń talaby boıynsha eńbek qaýipsizdigi jáne eńbekti qorǵaý jónindegi erejelerdi buzǵany úshin 47 laýazymdy adam atqaryp otyrǵan qyzmetinen bosatyldy. 11 qural-jabdyq, 2 óndiristik nysan men 7 uıymnyń jumysy toqtatyldy. 821 is quqyq qorǵaý organdaryna berilip, olarǵa qatysty 116 qylmystyq is qozǵaldy. Búgingi kúni 2 300 kásiporyn eńbek qaýipsizdigi jáne eńbekti qorǵaý jónindegi halyqaralyq jáne ulttyq standarttardy engizgen. 15 myńnan astam kásiporynda eńbek qaýipsizdigi men eńbekti qorǵaý jónindegi óndiristik keńester jumys isteýde», - dedi ol.
Birjan Nurymbetovtiń aıtýynsha, mınıstrlik maýsym aıynda Halyqaralyq áleýmettik qamsyzdandyrý qaýymdastyǵymen óndiristik jaraqatty azaıtýdy ilgeriletý boıynsha memorandým jasasqan. Onyń negizgi maqsaty – jazataıym oqıǵalar men zııandy eńbek jaǵdaıy bar jumys oryndarynyń sanyn qysqartý.
«Alaıda búgingi tańda 117 kásiporyn ǵana tujyrymdamaǵa qosyldy. Osyǵan baılanysty áleýmettik áriptesterdi atalǵan tujyrymdamaǵa belsendi túrde qosylýǵa shaqyramyz», - dedi Birjan Nurymbetov.
Eske sala ketsek, Úkimet basshysy jalaqyny bermeýdiń jumys berýshi úshin tıimsiz bolatyndaı etip zańnama normalaryn kúsheıtýdi tapsyrdy.
