Birjan Nurymbetov Qazaqstan kásipodaqtaryn kásibı merekelerimen quttyqtady

NUR-SULTAN. QazAqparat - QR Eńbek jáne halyqty áleýmettik qorǵaý mınıstri Birjan Nurymbetov Qazaqstannyń kásipodaq uıymdarynyń qyzmetkerlerin kásibı merekelerimen quttyqtap, jumysshylardyń máselelerin sheshýde belsendi jáne jemisti jumys tiledi. Bul týraly atalǵan vedomstvonyń baspasóz qyzmeti habarlady.

«Osy jyly alǵash ret 10 qazan kúni atap ótiletin Kásipodaqtar kúni merekesiniń belgilenýi qýantarlyq jaıt. Búginde Qazaqstanda 600-den astam kásipodaq bar, olar 3 mln-nan astam jumyskerlerdi biriktirdi. Kásipodaqtar eńbekshilerdiń áleýmettik jáne turmystyq máselelerin belsendi sheshedi, kásiporyndarda eńbek zańnamasy men qaýipsizdik tehnıkasynyń saqtalýyn baqylaýdy júzege asyrady. Qazaqstan kásipodaqtaryna belsendi jáne jemisti eńbek tileımin», - delingen mınıstrdiń quttyqtaýynda.

Mınıstr keltirgen málimetke saı, QR Úkimetimen yntymaqtastyq jyldarynda kásipodaqtar ózderin qyzmetkerlerdiń eńbek jáne áleýmettik-ekonomıkalyq múddelerin qorǵaý boıynsha belsendi qatysýshy jáne áriptes retinde kórsete bildi. Áleýmettik-eńbek máselelerin respýblıkalyq úshjaqty komıssııa formatynda ǵana emes, júıeli jumys kezdesýleri aıasynda de birlesip talqylaý dástúrge aınaldy. 2018-2020 jyldarǵa arnalǵan Bas kelisim iske asyrylýda, onda áleýmettik áriptestiktiń barlyq deńgeılerinde mindetti túrde saqtaý úshin memlekettiń, jumys berýshiler men jumyskerlerdiń áleýmettik jaýapkershiliginiń qaǵıdattary qalyptastyrylǵan.

Sondaı-aq, Birjan Nurymbetov qyzmetkerlerdiń quqyqtary men múddelerin qorǵaý jónindegi fýnktsııalardy oryndaý kezinde týyndaıtyn problemalardy sheshýde kásipodaqtardyń rólin kúsheıtý eńbek salasy kórsetkishteriniń, onyń ishinde sońǵy úsh jylda jaqsarýyna yqpal etkenin aıtady. «Máselen, óndiriste zardap shekken jumyskerlerdiń sany 6,8% - ǵa tómendedi, jasalǵan ujymdyq sharttar sany 43,3% - ǵa artty. Kásipodaqtardyń arqasynda jumysshylar mádenı jáne salaýatty demalysty uıymdastyrýǵa tartylǵan. Memleket eńbek qatynastary sýbektileriniń múddelerin ońtaıly kelisýge qol jetkizýge qabiletti kúshti jáne jaýapty kásiptik odaqtarǵa múddeli. Qoǵamdyq qatynastardy retteýdegi kásipodaqtardyń róli neǵurlym mańyzdy bolǵan saıyn, olar ózderiniń basty maqsatyn – qyzmetkerlerdiń áleýmettik-eńbek quqyqtary men múddelerin qorǵaýdy tıimdi jáne tabysty júzege asyra alady», - deıdi ol.