Birjan Nurymbetov: Eńbek resýrstarynyń sapasyna qoıylatyn talapty kúsheıtý kerek

NUR-SULTAN. QazAqparat - QR Eńbek jáne halyqty áleýmettik qorǵaý mınıstri Birjan Nurymbetov Eńbek kúni qarsańynda Qazaqstannyń barlyq azamattaryna baq-bereke, jumysqa degen qushtarlyq, áriptesterin qurmetteý jáne nátıjeli eńbek etýdi tiledi, dep habarlaıdy QazAqparat mınıstrliktiń baspasóz qyzmetine silteme jasap.

«Barlyq qazaqstandyqtardy qyrkúıektiń sońǵy jeksenbisinde toılanatyn «Eńbek kúni» merekesimen quttyqtaımyn. Bul mereke halqymyzdyń áleýmettik jáne ekonomıkalyq jetistikterine baǵyttalǵan. Ol qazaqstandyqtardyń Otanymyzdyń ál-aýqaty men gúldenýin qamtamasyz etetin eńbekke degen qurmetiniń kórinisi bolyp tabylady.Búgin naǵyz eńbektiń baǵasyn bilip, jumystaǵy jetistikterin maqtan tutatyndardyń merekesi», dedi Birjan Nurymbetov.

Ol Qazaqstannyń gúldenýine atsalysqan eńbekkerlerge alǵys aıtty.

«Bizdiń memleketimizdiń altyn qory – eńbek ardagerlerine, óziniń adal jáne sheksiz eńbegimen elimizdiń ekonomıkasynyń qalyptasýy men damýynyń negizin qalap, egemen Qazaqstannyń gúldenýi úshin aıtarlyqtaı áleýet qalyptastyrǵan otandastarymyzǵa zor rızashylyǵymdy bildirgim keledi. Sizder óz salasynyń mamandaryn daıarlaý boıynsha tálimgerlik dástúrlerińizdi nyǵaıtyp, jankeshti eńbek ıdeologııasyn óz ómirińizdiń negizgi prıntsıpi retinde alǵa jeteleısiz! Óz isine qurmet, borysh pen adaldyq – sizder úshin kúndelikti ómirdiń normasy men qajettiligine aınaldy», - dedi mınıstr.

«Eńbek dınastııalary men eńbek ardagerleriniń qatary jyldan jylǵa tolyǵa bersin! Sizder búgin de jastarǵa ózderińizdiń baı kásibı jáne adamgershilik tájirıbelerińizdi berýdi jalǵastyrýdasyzdar jáne jastardyń eńbekke, jumys mamandyqtaryna degen súıispenshiligin sińire otyryp, júrekterinde Otanǵa degen joǵary patrıottyq sezimin uıalatasyzdar.

Memleket basshysy Qasym-Jomart Toqaevtyń Qazaqstan halqyna Joldaýynda azamattardyń ál-aýqatyn odan ári kóterý úshin birqatar tıimdi áleýmettik-ekonomıkalyq reformalar qarastyrylǵan.

Bizdiń maqsatymyz - laıyqty jumys prıntsıpteri men standarttaryna negizdelgen eńbek qatynastaryn jáne olardy quqyqtyq retteýdi jaqsartý!», - dedi ol.

QR Eńbek jáne halyqty áleýmettik qorǵaý mınıstri Qazaqstan ekonomıkasy úshin jańa mindetterge jaýap beretin eńbek resýrstarynyń sapasyna qoıylatyn talaptardy arttyrýdy jalǵastyrý kerektigin atap ótti. «Barlyǵymyz óz jumysymyzdy súıispenshilikpen atqaryp, áriptesterimizdiń qurmetine bólenip, qyzmetimizde keremet jetistikterge jete bereıik.Men elimizdiń barlyq azamattaryna táýelsiz Qazaqstannyń órkendeýi men ıgiligi úshin tabysty eńbek etýin tileımin», – dedi Birjan Nurymbetov.

Aıta keterligi, Qazaqstan Prezıdenti Qasym-Jomart Toqaev qazaqstandyqtardy eńbek kúnimen quttyqtaǵan bolatyn.

Eske sala keteıik, Memleket basshysynyń 22 qarasha 2013 jylǵy jarlyǵymen qyrkúıek aıynyń sońǵy jeksenbisi eńbek kúni bolyp belgilengen.