Birjan Nurymbetov: Bizdi baqylaýsyz jahandyq kóshi-qon máselesi alańdatady
NUR-SULTAN. QazAqparat – Qazaqstandy baqylaýsyz jahandyq kóshi-qon máselesi alańdatady. Bul týraly búgin QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.
«Qazaqstan tranzıttik, mejeli, al keıingi kezde kóship-qonýshylardyń shyǵý eli sanalatyndyqtan bizdi baqylaýsyz jahandyq kóshi-qon máselesi alańdatyp otyr. Sondyqtan halyqaralyq jáne óńirlik deńgeıde derekterdi jınaý júıesi men biryńǵaı tásilderdi qalyptastyrý birinshi kezektegi mindet bolyp tur. Osyǵan oraı «Bosqyndar mártebesi týraly» konventsııada kózdelgen mindetter aıasynda Qazaqstan ótken jyldyń jeltoqsanynda Marokkoda qaýipsiz, tártipti jáne turaqty kóshi-qon jónindegi jahandyq kelisimge qosyldy», - dedi mınıstr «Qazaqstandaǵy kóshi-qon: Problemalar, tendentsııalar, perspektıvalar» atty respýblıkalyq dóńgelek ústel otyrysynda.
Onyń atap ótýinshe, kóshi-qon máselesi boıynsha turaqty dıalogqa járdemdesý, aqparat almasý óte mańyzdy. Buǵan qosa, rettelmeıtin kóshi-qonmen baılanysty problemalardy boljaý jáne sheshý úshin mıgratsııalyq aǵynǵa monıtorıng júrgizýdiń naqty tetikteri qajet.
«Qazaqstan mıgranttardyń zańdy quqyqtaryn qurmetteýge jáne jahandyq ári aımaqtyq deńgeıde ózara tıimdi yntymaqtastyqty nyǵaıtýǵa múddeli. Sondaı-aq kóshi-qon aǵynyn retteýge óz úlesin qosýǵa nıetti», - dedi Birjan Nurymbetov.
