Birjan Nurymbetov 2020 jyldy qorytyndylap, qazaqstandyqtardy Jańa jyl meıramymen quttyqtady
«Qymbatty qazaqstandyqtar! Ótken 2020 jyl COVID-19 pandemııasyna baılanysty búkil álem úshin qıyn synaq boldy, bizdiń elimizdi de aınalyp ótpedi. Pandemııamen jáne onyń saldarymen kúres Úkimetten aýrýdyń ósýin toqtatý jáne halyq pen el ekonomıkasy úshin aýqymdy teris saldarlardyń aldyn alý úshin buryn-sońdy bolmaǵan sharalar qabyldaýdy talap etti.
Memleket basshysynyń tapsyrmasy boıynsha Memlekettik áleýmettik saqtandyrý qorynyń qarajaty esebinen kiristerinen aıyrylǵan adamdarǵa eń tómengi jalaqy (42 500 teńge) mólsherinde aı saıynǵy tólemderdi berý tetigi jedel túrde ázirlenip, iske qosyldy. Tótenshe jaǵdaı jáne karantındik shekteý is-sharalary kezeńinde barlyǵy 4,6 mln adam jalpy somasy 476,1 mlrd. teńgege osyndaı tólemder aldy.
Sondaı-aq, TJ jáne karantın kezeńinde jalpy somasy 25 mlrd-tan astam teńgege 1,1 mln-nan astam adam azyq-túlik-turmystyq jıyntyqtar satyp alýǵa tólemder túrinde qosymsha qoldaý aldy.
Halyqty jumyspen qamtý boıynsha úlken jumys júrgizildi. Daǵdarysqa qarsy shara retinde jumyspen qamtýdyń jol kartasy ázirlenip, tabysty iske asyrylýda. Nátıjeli jumyspen qamtýdy jáne jappaı kásipkerlikti damytýdyń «Eńbek» memlekettik baǵdarlamasyn jáne basqa da memlekettik baǵdarlamalardy iske asyrýdyń arqasynda 1,2 mln. jumys ornyn qurý jáne saqtap qalý jáne jumyssyzdyqtyń ósýine jol bermeý múmkin boldy.
Bul rette, qıyn jaǵdaıǵa qaramastan, memlekettiń barlyq áleýmettik mindettemelerin oryndaý qamtamasyz etildi.
Qosymsha qoldaý maqsatynda zeınetaqy men járdemaqy mólsheri eki ret ındeksteldi. Bazalyq zeınetaqy men memlekettik járdemaqylardyń ósimi 2019 jylmen salystyrǵanda 10% – dy, yntymaqty zeınetaqynyń ósimi 12% - dy qurady.
2020 jylǵy 1 qańtardan bastap kópbalaly jáne tabysy az otbasylardy áleýmettik qoldaýdyń jańa tásilderi engizildi. Búgingi tańda 413,4 myń kópbalaly otbasy aı saıynǵy memlekettik járdemaqy alady, onyń mólsheri otbasynyń tabysyna emes, balalardyń sanyna baılanysty bolyp keledi.
Tabysy az otbasylardyń balalary úshin 2020 jylǵy 1 qańtardan bastap kepildik berilgen áleýmettik toptama engizildi. Áleýmettik kómektiń bul túrine 430 myń balaǵa alǵash ret 17,5 mlrd. teńge qarastyrylǵan.
Sondaı-aq, 2020 jylǵy 1 qańtardan bastap mindetti áleýmettik saqtandyrý júıesinen tólenetin uzaq merzimdi áleýmettik tólemderdiń mólsheri 2019 jylǵa qaraǵanda orta eseppen 50% - ǵa arttyryldy.
2020 jyly bıýdjet salasy qyzmetkerleriniń jalaqysy 2019 jylmen salystyrǵanda: mádenıet jáne óner salasynda 35%-dan 50% - ǵa deıin, pedagogterge 4 jyl ishinde jyl saıyn 25% - ǵa, áleýmettik qyzmetkerlerge 15% - dan 60% - ǵa deıin arttyryldy.
Uly Otan soǵysyndaǵy Jeńistiń 75 jyldyǵyn merekeleý sheńberinde 124,2 myń adam 7,6 mlrd teńge somasynda birjolǵy tólem aldy, bul 2019 jylǵy tólem somasynan úsh esege artyq. UOS qatysýshylary men múgedektigi bar adamdary úshin materıaldyq kómektiń mereıtoılyq mólsheri orta eseppen 1 mln teńgeni qurady, bul ótken jyldyń kóleminen orta eseppen 4 esege artyq. Alǵash ret «Ardagerler týraly» jańa zań qabyldandy.
Ótken jyly múgedektigi bar adamdarǵa áleýmettik qoldaý kórsetý júıesin jetildirý boıynsha da úlken jumys atqaryldy. Áleýmettik qyzmetter portalyn iske qosý basty jańashyldyq boldy. Onyń ereksheligi –múgedektigi bar adamdardyń ońaltýdyń tehnıkalyq quraldary men arnaýly áleýmettik qyzmetterdi olardyń reıtıngin, basqa paıdalanýshylardyń pikirlerin, baǵasy men sapasyn eskere otyryp, óz betinshe tańdaý múmkindigi. Servıs ońaltýdyń tehnıkalyq quraldary men arnaýly áleýmettik qyzmetterdi alý merzimin 6 aıdan 15 kúnge deıin qysqartýdy; bıznes-protsesterdiń ashyqtyǵyn, deldaldyq qyzmetterdi joıýdy; baǵalardy birizdendirýdi, bıýdjet qarajatyn tıimdi paıdalanýdy qamtamasyz etedi. Portal 400 myń múgedektigi bar azamattardy ońaltýdyń tehnıkalyq quraldarymen jáne arnaıy áleýmettik qyzmettermen qamtamasyz etý boıynsha qamtıdy.
Ótken jyly elimizdiń ıgiligi úshin jaýapty eńbek etip, ári qaraı onyń damýyna qatysýǵa daıyn barlyq azamattarǵa alǵys aıtqym keledi. Aldaǵy jyl bizge jańa perspektıvalar ashady, ıaǵnı jańa mindetter paıda bolady.
Bizdiń mindetimiz – azamattardyń ómir súrý sapasynyń ózgerýine qol jetkizý. Buǵan tek birlesken qajyrly eńbekpen qol jetkizýge bolady. Bul bizdiń qolymyzdan keletinine senimdimin. Eńbek jáne halyqty áleýmettik qorǵaý mınıstrligi qyzmetkerleriniń jáne óńirlerdegi áriptesterimizdiń joǵary kásibıligi men eńbekqorlyǵy osyndaı senimdiliktiń negizi bolyp tabylady.
Qurmetti áriptester men otandastar, sizderdi kele jatqan 2021 jylmen shyn júrekten quttyqtaımyn!
Jańa jyl – árqaısymyz úshin erekshe mereke. Biz onymen ómirimizdegi jaqsy ózgeristerge, týǵan elimizdiń senimdi damýyna úmit artamyz.
2021 jyly halyqtyń ómir súrý sapasynyń artýyn, otbasy men rýhanı qundylyqtardyń nyǵaıýyn shyn júrekten tileımin! Keler jyl elimiz úshin jaqsylyq pen jasampazdyq jyly bolsyn. Barsha qazaqstandyqtarǵa zor densaýlyq tileımin, ár shańyraqqa amandyq, baqyt pen mahabbat, qýanysh pen ózara túsinistik tileımin!» – delingen Birjan Nurymbetovtiń úndeýinde.
