Birjaqty qozǵalysty engizý júıesi Astana kósheleriniń júktemesin qalaı jeńildetti
ASTANA. QazAqparat - Astana kóshelerinde birjaqty qozǵalysty odan ári damytý tujyrymdamasy ázirlenip jatyr, dep habarlaıdy elorda ákimdiginiń resmı saıty.
Qalalyq kólik jáne jol-kólik ınfraqurylymyn damytý basqarmasy 2016 jyly Astanada birjaqty qozǵalysty engizý kólik aǵynynyń ortasha jyldamdyǵyn 33% arttyryp, joldardyń ótkizý qabiletin 25% deıin ulǵaıtýǵa múmkindik bergendigin málim etti.
Mysaly, Kenesary kóshesiniń boıymen júrýdiń ortasha ýaqyty 21 mınýttan 17 mınýtqa deıin, Abaı dańǵylymen júrýdiń ortasha ýaqyty 22 mınýttan 18 mınýtqa deıin qysqardy. Al qozǵalystyń ortasha jyldamdyǵy bul rette Kenesary kóshesinde 18,4 km/saǵ-tan 24,5 km/saǵ-qa deıin, Abaı dańǵylynda 15,8 km/saǵ-tan 21 km/saǵ-qa deıin artty. Sondaı-aq, Kenesary kóshesindegi qozǵalys qarqyny 1033 birlik/saǵ-tan 1476 birlik/saǵ-qa deıin, Abaı dańǵylynda 759 birlik/saǵ-tan 017 birlik/saǵ-qa deıin ulǵaıdy.
Qazirgi ýaqytta birjaqty qozǵalys Astana kósheleriniń jalpy uzyndyǵy 15,2 km quraıtyn 7 ýchaskesinde engizilgen.
«Máselen, Buqarbaı batyr jáne Jeltoqsan kósheleriniń qıylysynda birjaqty qozǵalysty engizý qorytyndylary boıynsha taldaý Buqarbaı batyr kóshesindegi jalpy kólik aǵyny 17% (303 birlik/saǵ-tan 355 birlik/saǵ-qa deıin) ulǵaıǵanyn kórsetip otyr. Ótken kezeńde atalǵan jol ýchaskesinde JKO tirkelgen joq», - dep málimdedi basqarma ókilderi.
Vedomstvonyń málimetinshe, qazirgi kezde birjaqty qozǵalysty odan ári damytý tujyrymdamasyn ázirleý jumysy júrgizilýde. Dálirek aıtqanda, kólik aǵynyna, baǵdarshamdyq retteý rejimine, kólik quraldarynyń faza boıynsha taraý kestelerine taldaý, sondaı-aq, jol qozǵalysyn uıymdastyrý kezinde kóliktik aǵyndardy odan ári ońtaılandyrý sharalary júrip jatyr.
«Bul tujyrymdama kólik quraldarynyń faza boıynsha taraý kestelerin ońtaılandyrý, qaqtyǵys núkteleri men baǵdarshamdyq fazalardyń sanyn azaıtý esebinen kólik qozǵalysynyń ortasha jyldamdyǵyn arttyrýǵa jáne jol qıylystaryndaǵy kidiristerdiń sanyn azaıtýǵa múmkindik beredi»,deıdi vedomstvo ókilderi.
